Read in తెలుగు / ಕನ್ನಡ / தமிழ் / English (IAST)
ದ್ವಿಸಪ್ತತಿತಮದಶಕಮ್ (೭೨) – ಅಕ್ರೂರಗೋಕುಲಯಾತ್ರಾ
ಕಂಸೋಽಥ ನಾರದಗಿರಾ ವ್ರಜವಾಸಿನಂ ತ್ವಾ-
ಮಾಕರ್ಣ್ಯ ದೀರ್ಣಹೃದಯಃ ಸ ಹಿ ಗಾನ್ದಿನೇಯಮ್ |
ಆಹೂಯ ಕಾರ್ಮುಕಮಖಚ್ಛಲತೋ ಭವನ್ತ-
ಮಾನೇತುಮೇನಮಹಿನೋದಹಿನಾಥಶಾಯಿನ್ || ೭೨-೧ ||
ಅಕ್ರೂರ ಏಷ ಭವದಙ್ಘ್ರಿಪರಶ್ಚಿರಾಯ
ತ್ವದ್ದರ್ಶನಾಕ್ಷಮಮನಾಃ ಕ್ಷಿತಿಪಾಲಭೀತ್ಯಾ |
ತಸ್ಯಾಜ್ಞಯೈವ ಪುನರೀಕ್ಷಿತುಮುದ್ಯತಸ್ತ್ವಾ-
ಮಾನನ್ದಭಾರಮತಿಭೂರಿತರಂ ಬಭಾರ || ೭೨-೨ ||
ಸೋಽಯಂ ರಥೇನ ಸುಕೃತೀ ಭವತೋ ನಿವಾಸಂ
ಗಚ್ಛನ್ಮನೋರಥಗಣಾಂಸ್ತ್ವಯಿ ಧಾರ್ಯಮಾಣಾನ್ |
ಆಸ್ವಾದಯನ್ಮುಹುರಪಾಯಭಯೇನ ದೈವಂ
ಸಮ್ಪ್ರಾರ್ಥಯನ್ಪಥಿ ನ ಕಿಞ್ಚಿದಪಿ ವ್ಯಜಾನಾತ್ || ೭೨-೩ ||
ದ್ರಕ್ಷ್ಯಾಮಿ ವೇದಶತಗೀತಗತಿಂ ಪುಮಾಂಸಂ
ಸ್ಪ್ರಕ್ಷ್ಯಾಮಿ ಕಿಂಸ್ವಿದಪಿನಾಮ ಪರಿಷ್ವಜೇಯಮ್ |
ಕಿಂ ವಕ್ಷ್ಯತೇ ಸ ಖಲು ಮಾಂ ಕ್ವನು ವೀಕ್ಷಿತಃ ಸ್ಯಾ-
ದಿತ್ಥಂ ನಿನಾಯ ಸ ಭವನ್ಮಯಮೇವ ಮಾರ್ಗಮ್ || ೭೨-೪ ||
ಭೂಯಃ ಕ್ರಮಾದಭಿವಿಶನ್ಭವದಙ್ಘ್ರಿಪೂತಂ
ವೃನ್ದಾವನಂ ಹರವಿರಿಞ್ಚಸುರಾಭಿವನ್ದ್ಯಮ್ |
ಆನನ್ದಮಗ್ನ ಇವ ಲಗ್ನ ಇವ ಪ್ರಮೋಹೇ
ಕಿಂ ಕಿಂ ದಶಾನ್ತರಮವಾಪ ನ ಪಙ್ಕಜಾಕ್ಷ || ೭೨-೫ ||
ಪಶ್ಯನ್ನವನ್ದತ ಭವದ್ವಿಹೃತಿಸ್ಥಲಾನಿ
ಪಾಂಸುಷ್ವವೇಷ್ಟತ ಭವಚ್ಚರಣಾಙ್ಕಿತೇಷು |
ಕಿಂ ಬ್ರೂಮಹೇ ಬಹುಜನಾ ಹಿ ತದಾಪಿ ಜಾತಾ
ಏವಂ ತು ಭಕ್ತಿತರಲಾ ವಿರಲಾಃ ಪರಾತ್ಮನ್ || ೭೨-೬ ||
ಸಾಯಂ ಸ ಗೋಪಭವನಾನಿ ಭವಚ್ಚರಿತ್ರ-
ಗೀತಾಮೃತಪ್ರಸೃತಕರ್ಣರಸಾಯನಾನಿ |
ಪಶ್ಯನ್ಪ್ರಮೋದಸರಿದೇವ ಕಿಲೋಹ್ಯಮಾನೋ
ಗಚ್ಛನ್ಭವದ್ಭವನಸನ್ನಿಧಿಮನ್ವಯಾಸೀತ್ || ೭೨-೭ ||
ತಾವದ್ದದರ್ಶ ಪಶುದೋಹವಿಲೋಕಲೋಲಂ
ಭಕ್ತೋತ್ತಮಾಗತಿಮಿವ ಪ್ರತಿಪಾಲಯನ್ತಮ್ |
ಭೂಮನ್ ಭವನ್ತಮಯಮಗ್ರಜವನ್ತಮನ್ತ-
ರ್ಬ್ರಹ್ಮಾನುಭೂತಿರಸಸಿನ್ಧುಮಿವೋದ್ವಮನ್ತಮ್ || ೭೨-೮ ||
ಸಾಯನ್ತನಾಪ್ಲವವಿಶೇಷವಿವಿಕ್ತಗಾತ್ರೌ
ದ್ವೌ ಪೀತನೀಲರುಚಿರಾಂಬರಲೋಭನೀಯೌ |
ನಾತಿಪ್ರಪಞ್ಚಧೃತಭೂಷಣಚಾರುವೇಷೌ
ಮನ್ದಸ್ಮಿತಾರ್ದ್ರವದನೌ ಸ ಯುವಾಂ ದದರ್ಶ || ೭೨-೯ ||
ದೂರಾದ್ರಥಾತ್ಸಮವರುಹ್ಯ ನಮನ್ತಮೇನ-
ಮುತ್ಥಾಪ್ಯ ಭಕ್ತಕುಲಮೌಲಿಮಥೋಪಗೂಹನ್ |
ಹರ್ಷಾನ್ಮಿತಾಕ್ಷರಗಿರಾ ಕುಶಲಾನುಯೋಗೀ
ಪಾಣಿಂ ಪ್ರಗೃಹ್ಯ ಸಬಲೋಽಥ ಗೃಹಂ ನಿನೇಥ || ೭೨-೧೦ ||
ನನ್ದೇನ ಸಾಕಮಮಿತಾದರಮರ್ಚಯಿತ್ವಾ
ತಂ ಯಾದವಂ ತದುದಿತಾಂ ನಿಶಮಯ್ಯ ವಾರ್ತಾಮ್ |
ಗೋಪೇಷು ಭೂಪತಿನಿದೇಶಕಥಾಂ ನಿವೇದ್ಯ
ನಾನಾಕಥಾಭಿರಿಹ ತೇನ ನಿಶಾಮನೈಷೀಃ || ೭೨-೧೧ ||
ಚನ್ದ್ರಾಗೃಹೇ ಕಿಮುತ ಚನ್ದ್ರಭಗಾಗೃಹೇ ನು
ರಾಧಾಗೃಹೇ ನು ಭವನೇ ಕಿಮು ಮೈತ್ರವಿನ್ದೇ |
ಧೂರ್ತೋ ವಿಲಂಬತ ಇತಿ ಪ್ರಮದಾಭಿರುಚ್ಚೈ-
ರಾಶಙ್ಕಿತೋ ನಿಶಿ ಮರುತ್ಪುರನಾಥ ಪಾಯಾಃ || ೭೨-೧೨ ||
ಇತಿ ದ್ವಿಸಪ್ತತಿತಮದಶಕಂ ಸಮಾಪ್ತಮ್ |
ನಾರಾಯಣೀಯಂ ತ್ರಿಸಪ್ತತಿತಮದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.