Kishkindha Kanda Sarga 30 – கிஷ்கிந்தா⁴காண்ட³ த்ரிம்ஶ꞉ ஸர்க³꞉ (30)

Read in తెలుగు / ಕನ್ನಡ / தமிழ் / देवनागरी / English (IAST)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ த்ரிம்ஶ꞉ ஸர்க³꞉ (30)

॥ ஶரத்³வர்ணனம் ॥

கு³ஹாம் ப்ரவிஷ்டே ஸுக்³ரீவே விமுக்தே க³க³னே க⁴னை꞉ ।
வர்ஷராத்ரோஷிதோ ராம꞉ காமஶோகாபி⁴பீடி³த꞉ ॥ 1 ॥

பாண்டு³ரம் க³க³னம் த்³ருஷ்ட்வா விமலம் சந்த்³ரமண்ட³லம் ।
ஶாரதீ³ம் ரஜனீம் சைவ த்³ருஷ்ட்வா ஜ்யோத்ஸ்னானுலேபனாம் ॥ 2 ॥

காமவ்ருத்தம் ச ஸுக்³ரீவம் நஷ்டாம் ச ஜனகாத்மஜாம் ।
பு³த்³த்⁴வா காலமதீதம் ச முமோஹ பரமாதுர꞉ ॥ 3 ॥

ஸ து ஸஞ்ஜ்ஞாமுபாக³ம்ய முஹூர்தான்மதிமான் புன꞉ ।
மன꞉ஸ்தா²மபி வைதே³ஹீம் சிந்தயாமாஸ ராக⁴வ꞉ ॥ 4 ॥

ஆஸீன꞉ பர்வதஸ்யாக்³ரே ஹேமதா⁴துவிபூ⁴ஷிதே ।
ஶாரத³ம் க³க³னம் த்³ருஷ்ட்வா ஜகா³ம மனஸா ப்ரியாம் ॥ 5 ॥

த்³ருஷ்ட்வா ச விமலம் வ்யோம க³தவித்³யுத்³ப³லாஹகம் ।
ஸாரஸாரவஸங்கு⁴ஷ்டம் விளலாபார்தயா கி³ரா ॥ 6 ॥

ஸாரஸாரவஸந்நாதை³꞉ ஸாரஸாரவநாதி³னீ ।
யா(ஆ)ஶ்ரமே ரமதே பா³லா ஸா(அ)த்³ய தே ரமதே கத²ம் ॥ 7 ॥

புஷ்பிதாம்ஶ்சாஸனான் த்³ருஷ்ட்வா காஞ்சனானிவ நிர்மலான் ।
கத²ம் ஸா ரமதே பா³லா பஶ்யந்தீ மாமபஶ்யதீ ॥ 8 ॥

யா புரா கலஹம்ஸானாம் ஸ்வரேண கலபா⁴ஷிணீ ।
பு³த்⁴யதே சாருஸர்வாங்கீ³ ஸா(அ)த்³ய மே பு³த்⁴யதே கத²ம் ॥ 9 ॥

நி꞉ஸ்வனம் சக்ரவாகானாம் நிஶம்ய ஸஹசாரிணாம் ।
புண்ட³ரீகவிஶாலாக்ஷீ கத²மேஷா ப⁴விஷ்யதி ॥ 10 ॥

ஸராம்ஸி ஸரிதோ வாபீ꞉ கானனானி வனானி ச ।
தாம் வினா ம்ருக³ஶாவாக்ஷீம் சரந்நாத்³ய ஸுக²ம் லபே⁴ ॥ 11 ॥

அபி தாம் மத்³வியோகா³ச்ச ஸௌகுமார்யாச்ச பா⁴மினீம் ।
ந தூ³ரம் பீட³யேத்காம꞉ ஶரத்³கு³ணநிரந்தர꞉ ॥ 12 ॥

ஏவமாதி³ நரஶ்ரேஷ்டோ² விளலாப ந்ருபாத்மஜ꞉ ।
விஹங்க³ இவ ஸாரங்க³꞉ ஸலிலம் த்ரித³ஶேஶ்வராத் ॥ 13 ॥

ததஶ்சஞ்சூர்ய ரம்யேஷு ப²லார்தீ² கி³ரிஸானுஷு ।
த³த³ர்ஶ பர்யுபாவ்ருத்தோ லக்ஷ்மீவான் லக்ஷ்மணோ(அ)க்³ரஜம் ॥ 14 ॥

தம் சிந்தயா து³꞉ஸஹயா பரீதம்
விஸஞ்ஜ்ஞமேகம் விஜனே மனஸ்வீ ।
ப்⁴ராதுர்விஷாதா³த்பரிதாபதீ³ன꞉
ஸமீக்ஷ்ய ஸௌமித்ரிருவாச ராமம் ॥ 15 ॥

கிமார்ய காமஸ்ய வஶங்க³தேன
கிமாத்மபௌருஷ்யபராப⁴வேன ।
அயம் ஸதா³ ஸம்ஹ்ரியதே ஸமாதி⁴꞉
கிமத்ர யோகே³ன நிவர்திதேன ॥ 16 ॥

க்ரியாபி⁴யோக³ம் மனஸ꞉ ப்ரஸாத³ம்
ஸமாதி⁴யோகா³னுக³தம் ச காலம் ।
ஸஹாயஸாமர்த்²யமதீ³னஸத்த்வ꞉
ஸ்வகர்மஹேதும் ச குருஷ்வ தாத ॥ 17 ॥

ந ஜானகீ மானவவம்ஶநாத²
த்வயா ஸநாதா² ஸுலபா⁴ பரேண ।
ந சாக்³னிசூடா³ம் ஜ்வலிதாமுபேத்ய
ந த³ஹ்யதே வீரவரார்ஹ கஶ்சித் ॥ 18 ॥

ஸலக்ஷணம் லக்ஷ்மணமப்ரத்⁴ருஷ்யம்
ஸ்வபா⁴வஜம் வாக்யமுவாச ராம꞉ ।
ஹிதம் ச பத்²யம் ச நயப்ரஸக்தம்
ஸஸாம த⁴ர்மார்த²ஸமாஹிதம் ச ॥ 19 ॥

நி꞉ஸம்ஶயம் கார்யமவேக்ஷிதவ்யம்
க்ரியாவிஶேஷோ ஹ்யனுவர்திதவ்ய꞉ ।
நனு ப்ரவ்ருத்தஸ்ய து³ராஸத³ஸ்ய
குமார கார்யஸ்ய ப²லம் ந சிந்த்யம் ॥ 20 ॥

அத² பத்³மபலாஶாக்ஷீம் மைதீ²லீமனுசிந்தயன் ।
உவாச லக்ஷ்மணம் ராமோ முகே²ன பரிஶுஷ்யதா ॥ 21 ॥

தர்பயித்வா ஸஹஸ்ராக்ஷ꞉ ஸலிலேன வஸுந்த⁴ராம் ।
நிர்வர்தயித்வா ஸஸ்யானி க்ருதகர்மா வ்யவஸ்தி²த꞉ ॥ 22 ॥

ஸ்னிக்³த⁴க³ம்பீ⁴ரநிர்கோ⁴ஷா꞉ ஶைலத்³ருமபுரோக³மா꞉ ।
விஸ்ருஜ்ய ஸலிலம் மேகா⁴꞉ பரிஶ்ராந்தா ந்ருபாத்மஜ ॥ 23 ॥

நீலோத்பலத³ளஶ்யாமா꞉ ஶ்யாமீக்ருத்வா தி³ஶோ த³ஶ ।
விமதா³ இவ மாதங்கா³꞉ ஶாந்தவேகா³꞉ பயோத⁴ரா꞉ ॥ 24 ॥

ஜலக³ர்பா⁴ மஹாவேகா³꞉ குடஜார்ஜுனக³ந்தி⁴ன꞉ ।
சரித்வா விரதா꞉ ஸௌம்ய வ்ருஷ்டிவாதா꞉ ஸமுத்³யதா꞉ ॥ 25 ॥

க⁴னானாம் வாரணானாம் ச மயூராணாம் ச லக்ஷ்மண ।
நாத³꞉ ப்ரஸ்ரவணானாம் ச ப்ரஶாந்த꞉ ஸஹஸா(அ)னக⁴ ॥ 26 ॥

அபி⁴வ்ருஷ்டா மஹாமேகை⁴ர்நிர்மலாஶ்சித்ரஸானவ꞉ ।
அனுலிப்தா இவாபா⁴ந்தி கி³ரயஶ்சித்ரதீ³ப்திபி⁴꞉ ॥ 27 ॥

த³ர்ஶயந்தி ஶரன்னத்³ய꞉ புலினானி ஶனை꞉ ஶனை꞉ ।
நவஸங்க³மஸவ்ரீடா³ ஜக⁴னானீவ யோஷித꞉ ॥ 28 ॥

ஶாகா²ஸு ஸப்தச்ச²த³பாத³பானாம்
ப்ரபா⁴ஸு தாரார்கநிஶாகராணாம் ।
லீலாஸு சைவோத்தமவாரணானாம்
ஶ்ரியம் விப⁴ஜ்யாத்³ய ஶரத்ப்ரவ்ருத்தா ॥ 29 ॥

ஸம்ப்ரத்யனேகாஶ்ரயசித்ரஶோபா⁴
லக்ஷ்மீ꞉ ஶரத்காலகு³ணோபனீதா ।
ஸூர்யாக்³ரஹஸ்தப்ரதிபோ³தி⁴தேஷு
பத்³மாகரேஷ்வப்⁴யதி⁴கம் விபா⁴தி ॥ 30 ॥

ஸப்தச்ச²தா³னாம் குஸுமோபக³ந்தீ⁴
ஷட்பாத³ப்³ருந்தை³ரனுகீ³யமான꞉ ।
மத்தத்³விபானாம் பவனோ(அ)னுஸாரீ
த³ர்பம் வனேஷ்வப்⁴யதி⁴கம் கரோதி ॥ 31 ॥

அப்⁴யாக³தைஶ்சாருவிஶாலபக்ஷை꞉
ஸர꞉ ப்ரியை꞉ பத்³மரஜோவகீர்ணை꞉ ।
மஹாநதீ³னாம் புலினோபயாதை꞉
க்ரீட³ந்தி ஹம்ஸா꞉ ஸஹ சக்ரவாகை꞉ ॥ 32 ॥

மத³ப்ரக³ள்பே⁴ஷு ச வாரணேஷு
க³வாம் ஸமூஹேஷு ச த³ர்பிதேஷு ।
ப்ரஸன்னதோயாஸு ச நிம்னகா³ஸு
விபா⁴தி லக்ஷ்மீர்ப³ஹுதா⁴ விப⁴க்தா ॥ 33 ॥

நப⁴꞉ ஸமீக்ஷ்யாம்பு³த⁴ரைர்விமுக்தம்
விமுக்தப³ர்ஹாப⁴ரணா வனேஷு ।
ப்ரியாஸ்வஸக்தா விநிவ்ருத்தஶோபா⁴
க³தோத்ஸவா த்⁴யானபரா மயூரா꞉ ॥ 34 ॥

மனோஜ்ஞக³ந்தை⁴꞉ ப்ரியகைரனல்பை꞉
புஷ்பாதிபா⁴ராவனதாக்³ரஶாகை²꞉ ।
ஸுவர்ணகௌ³ரைர்நயநாபி⁴ராமை-
-ருத்³த்³யோதிதானீவ வனாந்தராணி ॥ 35 ॥

ப்ரியான்விதானாம் ளினீப்ரியாணாம்
வனே ரதானாம் குஸுமோத்³த⁴தானாம் ।
மதோ³த்கடானாம் மத³ளாலஸானாம்
க³ஜோத்தமானாம் க³தயோ(அ)த்³ய மந்தா³꞉ ॥ 36 ॥

வ்யப்⁴ரம் நப⁴꞉ ஶஸ்த்ரவிதௌ⁴தவர்ணம்
க்ருஶப்ரவாஹானி நதீ³ஜலானி ।
கல்ஹாரஶீதா꞉ பவனா꞉ ப்ரவாந்தி
தமோவிமுக்தாஶ்ச தி³ஶ꞉ ப்ரகாஶா꞉ ॥ 37 ॥

ஸூர்யாதபக்ராமணநஷ்டபங்கா
பூ⁴மிஶ்சிரோத்³கா⁴டிதஸாந்த்³ரரேணு꞉ ।
அன்யோன்யவைரேண ஸமாயுதானா-
-முத்³யோக³காலோ(அ)த்³ய நராதி⁴பானாம் ॥ 38 ॥

ஶரத்³கு³ணாப்யாயிதரூபஶோபா⁴꞉
ப்ரஹர்ஷிதா꞉ பாம்ஸுஸமுக்ஷிதாங்கா³꞉ ।
மதோ³த்கடா꞉ ஸம்ப்ரதி யுத்³த⁴ளுப்³தா⁴
வ்ருஷா க³வாம் மத்⁴யக³தா நத³ந்தி ॥ 39 ॥

ஸமன்மத²ம் தீவ்ரக³தானுராகா³꞉
குலான்விதா மந்த³க³திம் கரிண்ய꞉ ।
மதா³ன்விதம் ஸம்பரிவார்ய யாந்தம்
வனேஷு ப⁴ர்தாரமனுப்ரயாந்தி ॥ 40 ॥

த்யக்த்வா வராண்யாத்மவிபூ⁴ஷணானி
ப³ர்ஹாணி தீரோபக³தா நதீ³னாம் ।
நிர்ப⁴ர்த்ஸ்யமானா இவ ஸாரஸௌகை⁴꞉
ப்ரயாந்தி தீ³னா விமதா³ மயூரா꞉ ॥ 41 ॥

வித்ராஸ்ய காரண்ட³வசக்ரவாகான்
மஹாரவைர்பி⁴ன்னகடா க³ஜேந்த்³ரா꞉ ।
ஸர꞉ஸு ப³த்³தா⁴ம்பு³ஜபூ⁴ஷணேஷு
விக்ஷோப்⁴ய விக்ஷோப்⁴ய ஜலம் பிப³ந்தி ॥ 42 ॥

வ்யபேதபங்காஸு ஸவாலுகாஸு
ப்ரஸன்னதோயாஸு ஸகோ³குலாஸு ।
ஸஸாரஸா ராவவிநாதி³தாஸு
நதீ³ஷு ஹ்ருஷ்டா நிபதந்தி ஹம்ஸா꞉ ॥ 43 ॥

நதீ³க⁴னப்ரஸ்ரவணோத³கானா-
-மதிப்ரவ்ருத்³தா⁴னிலப³ர்ஹிணானாம் ।
ப்லவங்க³மானாம் ச க³தோத்ஸவானாம்
த்³ருதம் ரவா꞉ ஸம்ப்ரதி ஸம்ப்ரநஷ்டா꞉ ॥ 44 ॥

அனேகவர்ணா꞉ ஸுவிநஷ்டகாயா
நவோதி³தேஷ்வம்பு³த⁴ரேஷு நஷ்டா꞉ ।
க்ஷுதா⁴ர்தி³தா கோ⁴ரவிஷா பி³லேப்⁴ய-
-ஶ்சிரோஷிதா விப்ரஸரந்தி ஸர்பா꞉ ॥ 45 ॥

சஞ்சச்சந்த்³ரகரஸ்பர்ஶஹர்ஷோன்மீலிததாரகா ।
அஹோ ராக³வதீ ஸந்த்⁴யா ஜஹாதி ஸ்வயமம்ப³ரம் ॥ 46 ॥

ராத்ரி꞉ ஶஶாங்கோதி³தஸௌம்யவக்த்ரா
தாராக³ணோன்மீலிதசாருநேத்ரா ।
ஜ்யோத்ஸ்னாம்ஶுகப்ராவரணா விபா⁴தி
நாரீவ ஶுக்லாம்ஶுகஸம்வ்ருதாங்கீ³ ॥ 47 ॥

விபக்வஶாலிப்ரஸவானி பு⁴க்த்வா
ப்ரஹர்ஷிதா ஸாரஸசாருபங்க்தி꞉ ।
நப⁴꞉ ஸமாக்ராமதி ஶீக்⁴ரவேகா³
வாதாவதூ⁴தா க்³ரதி²தேவ மாலா ॥ 48 ॥

ஸுப்தைகஹம்ஸம் குமுதை³ருபேதம்
மஹாஹ்ரத³ஸ்த²ம் ஸலிலம் விபா⁴தி ।
க⁴னைர்விமுக்தம் நிஶி பூர்ணசந்த்³ரம்
தாராக³ணாகீர்ணமிவாந்தரிக்ஷம் ॥ 49 ॥

ப்ரகீர்ணஹம்ஸாகுலமேக²லானாம்
ப்ரபு³த்³த⁴பத்³மோத்பலமாலினீனாம் ।
வாப்யுத்தமாநாமதி⁴கா(அ)த்³ய லக்ஷ்மீ-
-ர்வராங்க³னாநாமிவ பூ⁴ஷிதானாம் ॥ 50 ॥

வேணுஸ்வநவ்யஞ்ஜிததூர்யமிஶ்ர꞉
ப்ரத்யூஷகாலானிலஸம்ப்ரவ்ருத்³த⁴꞉ ।
ஸம்மூர்சி²தோ க³ஹ்வரகோ³வ்ருஷாணா-
-மன்யோன்யமாபூரயதீவ ஶப்³த³꞉ ॥ 51 ॥

நவைர்நதீ³னாம் குஸுமப்ரபா⁴ஸை-
-ர்வ்யாதூ⁴யமானைர்ம்ருது³மாருதேன ।
தௌ⁴தாமலக்ஷௌமபடப்ரகாஶை꞉
கூலானி காஶைருபஶோபி⁴தானி ॥ 52 ॥

வனப்ரசண்டா³ மது⁴பானஶௌண்டா³꞉
ப்ரியான்விதா꞉ ஷட்சரணா꞉ ப்ரஹ்ருஷ்டா꞉ ।
வனேஷு மத்தா꞉ பவனானுயாத்ராம்
குர்வந்தி பத்³மாஸனரேணுகௌ³ரா꞉ ॥ 53 ॥

ஜலம் ப்ரஸன்னம் குமுத³ம் ப்ரபா⁴ஸம்
க்ரௌஞ்சஸ்வன꞉ ஶாலிவனம் விபக்வம் ।
ம்ருது³ஶ்ச வாயுர்விமலஶ்ச சந்த்³ர꞉
ஶம்ஸந்தி வர்ஷவ்யபனீதகாலம் ॥ 54 ॥

மீனோபஸந்த³ர்ஶிதமேக²லானாம்
நதீ³வதூ⁴னாம் க³தயோ(அ)த்³ய மந்தா³꞉ ।
காந்தோபபு⁴க்தாலஸகா³மினீனாம்
ப்ரபா⁴தகாலேஷ்விவ காமினீனாம் ॥ 55 ॥

ஸசக்ரவாகானி ஸஶைவலானி
காஶைர்து³கூலைரிவ ஸம்வ்ருதானி ।
ஸபத்ரளேகா²னி ஸரோசனானி
வதூ⁴முகா²னீவ நதீ³முகா²னி ॥ 56 ॥

ப்ரபு²ல்லபா³ணாஸனசித்ரிதேஷு
ப்ரஹ்ருஷ்டஷட்பாத³னிகூஜிதேஷு ।
க்³ருஹீதசாபோத்³யதசண்ட³த³ண்ட³꞉
ப்ரசண்ட³சாரோ(அ)த்³ய வனேஷு காம꞉ ॥ 57 ॥

லோகம் ஸுவ்ருஷ்ட்யா பரிதோஷயித்வா
நதீ³ஸ்தடாகானி ச பூரயித்வா ।
நிஷ்பன்னஸஸ்யாம் வஸுதா⁴ம் ச க்ருத்வா
த்யக்த்வா நப⁴ஸ்தோயத⁴ரா꞉ ப்ரநஷ்டா꞉ ॥ 58 ॥

ப்ரஸன்னஸலிலா꞉ ஸௌம்ய குரரீபி⁴ர்விநாதி³தா꞉ ।
சக்ரவாகக³ணாகீர்ணா விபா⁴ந்தி ஸலிலாஶயா꞉ ॥ 59 ॥

அஸனா꞉ ஸப்தவர்ணாஶ்ச கோவிதா³ராஶ்ச புஷ்பிதா꞉ ।
த்³ருஶ்யந்தே ப³ந்து⁴ஜீவாஶ்ச ஶ்யாமாஶ்ச கி³ரிஸானுஷு ॥ 60 ॥

ஹம்ஸஸாரஸசக்ராஹ்வை꞉ குரரைஶ்ச ஸமந்தத꞉ ।
புலினான்யவகீர்ணானி நதீ³னாம் பஶ்ய லக்ஷ்மண ॥ 61 ॥

அன்யோன்யம் ப³த்³த⁴வைராணாம் ஜிகீ³ஷூணாம் ந்ருபாத்மஜ ।
உத்³யோக³ஸமய꞉ ஸௌம்ய பார்தி²வாநாமுபஸ்தி²த꞉ ॥ 62 ॥

இயம் ஸா ப்ரத²மா யாத்ரா பார்தி²வானாம் ந்ருபாத்மஜ ।
ந ச பஶ்யாமி ஸுக்³ரீவமுத்³யோக³ம் வா ததா²வித⁴ம் ॥ 63 ॥

சத்வாரோ வார்ஷிகா மாஸா க³தா வர்ஷஶதோபமா꞉ ।
மம ஶோகாபி⁴பூ⁴தஸ்ய ஸௌம்ய ஸீதாமபஶ்யத꞉ ॥ 64 ॥

சக்ரவாகீவ ப⁴ர்தாரம் ப்ருஷ்ட²தோ(அ)னுக³தா வனம் ।
விஷமம் த³ண்ட³காரண்யமுத்³யானமிவ சாங்க³னா ॥ 65 ॥

ப்ரியாவிஹீனே து³꞉கா²ர்தே ஹ்ருதராஜ்யே விவாஸிதே ।
க்ருபாம் ந குருதே ராஜா ஸுக்³ரீவோ மயி லக்ஷ்மண ॥ 66 ॥

அநாதோ² ஹ்ருதராஜ்யோ(அ)யம் ராவணேன ச த⁴ர்ஷித꞉ ।
தீ³னோ தூ³ரக்³ருஹ꞉ காமீ மாம் சைவ ஶரணம் க³த꞉ ॥ 67 ॥

இத்யேதை꞉ காரணை꞉ ஸௌம்ய ஸுக்³ரீவஸ்ய து³ராத்மன꞉ ।
அஹம் வானரராஜஸ்ய பரிபூ⁴த꞉ பரந்தப ॥ 68 ॥

ஸ காலம் பரிஸங்க்²யாய ஸீதாயா꞉ பரிமார்க³ணே ।
க்ருதார்த²꞉ ஸமயம் க்ருத்வா து³ர்மதிர்னாவபு³த்⁴யதே ॥ 69 ॥

ஸ கிஷ்கிந்தா⁴ம் ப்ரவிஶ்ய த்வம் ப்³ரூஹி வானரபுங்க³வம் ।
மூர்க²ம் க்³ராம்யஸுகே² ஸக்தம் ஸுக்³ரீவம் வசனான்மம ॥ 70 ॥

அர்தி²நாமுபபன்னானாம் பூர்வம் சாப்யுபகாரிணாம் ।
ஆஶாம் ஸம்ஶ்ருத்ய யோ ஹந்தி ஸ லோகே புருஷாத⁴ம꞉ ॥ 71 ॥

ஶுப⁴ம் வா யதி³ வா பாபம் யோ ஹி வாக்யமுதீ³ரிதம் ।
ஸத்யேன பரிக்³ருஹ்ணாதி ஸ வீர꞉ புருஷோத்தம꞉ ॥ 72 ॥

க்ருதார்தா² ஹ்யக்ருதார்தா²னாம் மித்ராணாம் ந ப⁴வந்தி யே ।
தான் ம்ருதானபி க்ரவ்யாதா³꞉ க்ருதக்⁴னான்னோபபு⁴ஞ்ஜதே ॥ 73 ॥

நூனம் காஞ்சனப்ருஷ்ட²ஸ்ய விக்ருஷ்டஸ்ய மயா ரணே ।
த்³ரஷ்டுமிச்ச²தி சாபஸ்ய ரூபம் வித்³யுத்³க³ணோபமம் ॥ 74 ॥

கோ⁴ரம் ஜ்யாதலநிர்கோ⁴ஷம் க்ருத்³த⁴ஸ்ய மம ஸம்யுகே³ ।
நிர்கோ⁴ஷமிவ வஜ்ரஸ்ய புன꞉ ஸம்ஶ்ரோதுமிச்ச²தி ॥ 75 ॥

காமமேவம் க³தே(அ)ப்யஸ்ய பரிஜ்ஞாதே பராக்ரமே ।
த்வத்ஸஹாயஸ்ய மே வீர ந சிந்தா ஸ்யாந்ந்ருபாத்மஜ ॥ 76 ॥

யத³ர்த²மயமாரம்ப⁴꞉ க்ருத꞉ பரபுரஞ்ஜய ।
ஸமயம் நாபி⁴ஜானாதி க்ருதார்த²꞉ ப்லவகே³ஶ்வர꞉ ॥ 77 ॥

வர்ஷாஸமயகாலம் து ப்ரதிஜ்ஞாய ஹரீஶ்வர꞉ ।
வ்யதீதாம்ஶ்சதுரோ மாஸான் விஹரன்னாவபு³த்⁴யதே ॥ 78 ॥

ஸாமாத்யபரிஷத் க்ரீட³ன் பானமேவோபஸேவதே ।
ஶோகதீ³னேஷு நாஸ்மாஸு ஸுக்³ரீவ꞉ குருதே த³யாம் ॥ 79 ॥

உச்யதாம் க³ச்ச² ஸுக்³ரீவஸ்த்வயா வத்ஸ மஹாப³ல ।
மம ரோஷஸ்ய யத்³ரூபம் ப்³ரூயாஶ்சைனமித³ம் வச꞉ ॥ 80 ॥

ந ச ஸங்குசித꞉ பந்தா² யேன வாலீ ஹதோ க³த꞉ ।
ஸமயே திஷ்ட² ஸுக்³ரீவ மா வாலிபத²மன்வகா³꞉ ॥ 81 ॥

ஏக ஏவ ரணே வாலீ ஶரேண நிஹதோ மயா ।
த்வாம் து ஸத்யாத³திக்ராந்தம் ஹநிஷ்யாமி ஸபா³ந்த⁴வம் ॥ 82 ॥

ததே³வம் விஹிதே கார்யே யத்³தி⁴தம் புருஷர்ஷப⁴ ।
தத்தத்³ப்³ரூஹி நரஶ்ரேஷ்ட² த்வர காலவ்யதிக்ரம꞉ ॥ 83 ॥

குருஷ்வ ஸத்யம் மயி வானரேஶ்வர
ப்ரதிஶ்ருதம் த⁴ர்மமவேக்ஷ்ய ஶாஶ்வதம் ।
மா வாலினம் ப்ரேத்ய க³தோ யமக்ஷயம்
த்வமத்³ய பஶ்யேர்மம சோதி³தை꞉ ஶரை꞉ ॥ 84 ॥

ஸ பூர்வஜம் தீவ்ரவிவ்ருத்³த⁴கோபம்
லாலப்யமானம் ப்ரஸமீக்ஷ்ய தீ³னம் ।
சகார தீவ்ரம் மதிமுக்³ரதேஜா
ஹரீஶ்வரே மானவவம்ஶநாத²꞉ ॥ 85 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ த்ரிம்ஶ꞉ ஸர்க³꞉ ॥ 30 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.