Kishkindha Kanda Sarga 3 – கிஷ்கிந்தா⁴காண்ட³ த்ருதீய꞉ ஸர்க³꞉ (3)

Read in తెలుగు / ಕನ್ನಡ / தமிழ் / देवनागरी / English (IAST)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ த்ருதீய꞉ ஸர்க³꞉ (3)

॥ ஹநூமத்ப்ரேஷணம் ॥

வசோ விஜ்ஞாய ஹநுமாந் ஸுக்³ரீவஸ்ய மஹாத்மந꞉ ।
பர்வதாத்³ருஶ்யமூகாத்து புப்லுவே யத்ர ராக⁴வௌ ॥ 1 ॥

கபிரூபம் பரித்யஜ்ய ஹநுமாந் மாருதாத்மஜ꞉ ।
பி⁴க்ஷுரூபம் ததோ பே⁴ஜே ஶட²பு³த்³தி⁴தயா கபி꞉ ॥ 2 ॥

தத꞉ ஸ ஹநுமாந் வாசா ஶ்லக்ஷ்ணயா ஸுமநோஜ்ஞயா ।
விநீதவது³பாக³ம்ய ராக⁴வௌ ப்ரணிபத்ய ச ॥ 3 ॥

ஆப³பா⁴ஷே ததா³ வீரௌ யதா²வத் ப்ரஶஶம்ஸ ச ।
ஸம்பூஜ்ய விதி⁴வத்³வீரோ ஹநுமாந் மாருதாத்மஜ꞉ ॥ 4 ॥

உவாச காமதோ வாக்யம் ம்ருது³ ஸத்யபராக்ரமௌ ।
ராஜர்ஷிதே³வப்ரதிமௌ தாபஸௌ ஸம்ஶிதவ்ரதௌ ॥ 5 ॥

தே³ஶம் கத²மிமம் ப்ராப்தௌ ப⁴வந்தௌ வரவர்ணிநௌ ।
த்ராஸயந்தௌ ம்ருக³க³ணாநந்யாம்ஶ்ச வநசாரிண꞉ ॥ 6 ॥

பம்பாதீரருஹாந் வ்ருக்ஷாந் வீக்ஷமாணௌ ஸமந்தத꞉ ।
இமாம் நதீ³ம் ஶுப⁴ஜலாம் ஶோப⁴யந்தௌ தபஸ்விநௌ ॥ 7 ॥

தை⁴ர்யவந்தௌ ஸுவர்ணாபௌ⁴ கௌ யுவாம் சீரவாஸஸௌ ।
நி꞉ஶ்வஸந்தௌ வரபு⁴ஜௌ பீட³யந்தாவிமா꞉ ப்ரஜா꞉ ॥ 8 ॥

ஸிம்ஹவிப்ரேக்ஷிதௌ வீரௌ ஸிம்ஹாதிப³லவிக்ரமௌ ।
ஶக்ரசாபநிபே⁴ சாபே க்³ருஹீத்வா ஶத்ருஸூத³நௌ ॥ 9 ॥

ஶ்ரீமந்தௌ ரூபஸம்பந்நௌ வ்ருஷப⁴ஶ்ரேஷ்ட²விக்ரமௌ ।
ஹஸ்திஹஸ்தோபமபு⁴ஜௌ த்³யுதிமந்தௌ நரர்ஷபௌ⁴ ॥ 10 ॥

ப்ரப⁴யா பர்வதேந்த்³ரோ(அ)யம் யுவயோரவபா⁴ஸித꞉ ।
ராஜ்யார்ஹாவமரப்ரக்²யௌ கத²ம் தே³ஶமிஹாக³தௌ ॥ 11 ॥

பத்³மபத்ரேக்ஷணௌ வீரௌ ஜடாமண்ட³லதா⁴ரிணௌ ।
அந்யோந்யஸத்³ருஶௌ வீரௌ தே³வலோகாதி³வாக³தௌ ॥ 12 ॥

யத்³ருச்ச²யேவ ஸம்ப்ராப்தௌ சந்த்³ரஸூர்யௌ வஸுந்த⁴ராம் ।
விஶாலவக்ஷஸௌ வீரௌ மாநுஷௌ தே³வரூபிணௌ ॥ 13 ॥

ஸிம்ஹஸ்கந்தௌ⁴ மஹோத்ஸாஹௌ ஸமதா³விவ கோ³வ்ருஷௌ ।
ஆயதாஶ்ச ஸுவ்ருத்தாஶ்ச பா³ஹவ꞉ பரிகோ⁴பமா꞉ ॥ 14 ॥

ஸர்வபூ⁴ஷணபூ⁴ஷார்ஹா꞉ கிமர்த²ம் ந விபூ⁴ஷிதா꞉ ।
உபௌ⁴ யோக்³யாவஹம் மந்யே ரக்ஷிதும் ப்ருதி²வீமிமாம் ॥ 15 ॥

ஸஸாக³ரவநாம் க்ருத்ஸ்நாம் விந்த்⁴யமேருவிபூ⁴ஷிதாம் ।
இமே ச த⁴நுஷீ சித்ரே ஶ்லக்ஷ்ணே சித்ராநுலேபநே ॥ 16 ॥

ப்ரகாஶேதே யதே²ந்த்³ரஸ்ய வஜ்ரே ஹேமவிபூ⁴ஷிதே ।
ஸம்பூர்ணா நிஶிதைர்பா³ணைஸ்தூணாஶ்ச ஶுப⁴த³ர்ஶநா꞉ ॥ 17 ॥

ஜீவிதாந்தகரைர்கோ⁴ரை꞉ ஶ்வஸத்³பி⁴ரிவ பந்நகை³꞉ ।
மஹாப்ரமாணௌ விஸ்தீர்ணௌ தப்தஹாடகபூ⁴ஷிதௌ ॥ 18 ॥

க²ட்³கா³வேதௌ விராஜேதே நிர்முக்தாவிவ பந்நாகௌ³ ।
ஏவம் மாம் பரிபா⁴ஷந்தம் கஸ்மாத்³வை நாபி⁴பா⁴ஷத²꞉ ॥ 19 ॥

ஸுக்³ரீவோ நாம த⁴ர்மாத்மா கஶ்சித்³வாநரயூத²ப꞉ ।
வீரோ விநிக்ருதோ ப்⁴ராத்ரா ஜக³த்³ப்⁴ரமதி து³꞉கி²த꞉ ॥ 20 ॥

ப்ராப்தோ(அ)ஹம் ப்ரேஷிதஸ்தேந ஸுக்³ரீவேண மஹாத்மநா ।
ராஜ்ஞா வாநரமுக்²யாநாம் ஹநூமாந்நாம வாநர꞉ ॥ 21 ॥

யுவாப்⁴யாம் ஸஹ த⁴ர்மாத்மா ஸுக்³ரீவ꞉ ஸக்²யமிச்ச²தி ।
தஸ்ய மாம் ஸசிவம் வித்³தி⁴ வாநரம் பவநாத்மஜம் ॥ 22 ॥ [வித்தம்]

பி⁴க்ஷுரூபப்ரதிச்ச²ந்நம் ஸுக்³ரீவப்ரியகாம்யயா ।
ருஶ்யமூகாதி³ஹ ப்ராப்தம் காமக³ம் காமரூபிணம் ॥ 23 ॥

ஏவமுக்த்வா து ஹநுமாம்ஸ்தௌ வீரௌ ராமலக்ஷ்மணௌ ।
வாக்யஜ்ஞௌ வாக்யகுஶல꞉ புநர்நோவாச கிஞ்சந ॥ 24 ॥

ஏதச்ச்²ருத்வா வசஸ்தஸ்ய ராமோ லக்ஷ்மணமப்³ரவீத் ।
ப்ரஹ்ருஷ்டவத³ந꞉ ஶ்ரீமாந் ப்⁴ராதரம் பார்ஶ்வத꞉ ஸ்தி²தம் ॥ 25 ॥

ஸசிவோ(அ)யம் கபீந்த்³ரஸ்ய ஸுக்³ரீவஸ்ய மஹாத்மந꞉ ।
தமேவ காங்க்ஷமாணஸ்ய மமாந்திகமுபாக³த꞉ ॥ 26 ॥

தமப்⁴யபா⁴ஷ ஸௌமித்ரே ஸுக்³ரீவஸசிவம் கபிம் ।
வாக்யஜ்ஞம் மது⁴ரைர்வாக்யை꞉ ஸ்நேஹயுக்தமரிந்த³ம ॥ 27 ॥

நாந்ருக்³வேத³விநீதஸ்ய நாயஜுர்வேத³தா⁴ரிண꞉ ।
நாஸாமவேத³விது³ஷ꞉ ஶக்யமேவம் ப்ரபா⁴ஷிதும் ॥ 28 ॥

நூநம் வ்யாகரணம் க்ருத்ஸ்நமநேந ப³ஹுதா⁴ ஶ்ருதம் ।
ப³ஹு வ்யாஹரதாநேந ந கிஞ்சித³பஶப்³தி³தம் ॥ 29 ॥

ந முகே² நேத்ரயோர்வா(அ)பி லலாடே ச ப்⁴ருவோஸ்ததா² ।
அந்யேஷ்வபி ச கா³த்ரேஷு தோ³ஷ꞉ ஸம்விதி³த꞉ க்வசித் ॥ 30 ॥

அவிஸ்தரமஸந்தி³க்³த⁴மவிளம்பி³தமத்³ருதம் ।
உர꞉ஸ்த²ம் கண்ட²க³ம் வாக்யம் வர்ததே மத்⁴யமே ஸ்வரே ॥ 31 ॥

ஸம்ஸ்காரக்ரமஸம்பந்நாமத்³ருதாமவிளம்பி³தாம் ।
உச்சாரயதி கல்யாணீம் வாசம் ஹ்ருத³யஹாரிணீம் ॥ 32 ॥

அநயா சித்ரயா வாசா த்ரிஸ்தா²நவ்யஞ்ஜநஸ்த²யா ।
கஸ்ய நாராத்⁴யதே சித்தமுத்³யதாஸேரரேரபி ॥ 33 ॥

ஏவம்விதோ⁴ யஸ்ய தூ³தோ ந ப⁴வேத்பார்தி²வஸ்ய து ।
ஸித்⁴யந்தி ஹி கத²ம் தஸ்ய கார்யாணாம் க³தயோ(அ)நக⁴ ॥ 34 ॥

ஏவம் கு³ணக³ணைர்யுக்தா யஸ்ய ஸ்யு꞉ கார்யஸாத⁴கா꞉ ।
தஸ்ய ஸித்⁴யந்தி ஸர்வார்தா² தூ³தவாக்யப்ரசோதி³தா꞉ ॥ 35 ॥

ஏவமுக்தஸ்து ஸௌமித்ரி꞉ ஸுக்³ரீவஸசிவம் கபிம் ।
அப்⁴யபா⁴ஷத வாக்யஜ்ஞோ வாக்யஜ்ஞம் பவநாத்மஜம் ॥ 36 ॥

விதி³தா நௌ கு³ணா வித்³வந் ஸுக்³ரீவஸ்ய மஹாத்மந꞉ ।
தமேவ சாவாம் மார்கா³வ꞉ ஸுக்³ரீவம் ப்லவகே³ஶ்வரம் ॥ 37 ॥

யதா² ப்³ரவீஷி ஹநுமந் ஸுக்³ரீவவசநாதி³ஹ ।
தத்ததா² ஹி கரிஷ்யாவோ வசநாத்தவ ஸத்தம ॥ 38 ॥

தத்தஸ்ய வாக்யம் நிபுணம் நிஶம்ய
ப்ரஹ்ருஷ்டரூப꞉ பவநாத்மஜ꞉ கபி꞉ ।
மந꞉ ஸமாதா⁴ய ஜயோபபத்தௌ
ஸக்²யம் ததா³ கர்துமியேஷ தாப்⁴யாம் ॥ 39 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ த்ருதீய꞉ ஸர்க³꞉ ॥ 3 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.