Read in తెలుగు / ಕನ್ನಡ / தமிழ் / English (IAST)
ఏకషష్టితమదశకమ్ (౬౧) – విప్రపత్న్యనుగ్రహమ్
తతశ్చ వృన్దావనతోఽతిదూరతో
వనం గతస్త్వం ఖలు గోపగోకులైః |
హృదన్తరే భక్తతరద్విజాఙ్గనా-
కదంబకానుగ్రహణాగ్రహం వహన్ || ౬౧-౧ ||
తతో నిరీక్ష్యాశరణే వనాన్తరే
కిశోరలోకం క్షుధితం తృషాకులమ్ |
అదూరతో యజ్ఞపరాన్ ద్విజాన్ప్రతి
వ్యసర్జయో దీదివియాచనాయ తాన్ || ౬౧-౨ ||
గతేష్వథో తేష్వభిధాయ తేఽభిధాం
కుమారకేష్వోదనయాచిషు ప్రభో |
శ్రుతిస్థిరా అప్యభినిన్యురశ్రుతిం
న కిఞ్చిదూచుశ్చ మహీసురోత్తమాః || ౬౧-౩ ||
అనాదరాత్ఖిన్నధియో హి బాలకాః
సమాయయుర్యుక్తమిదం హి యజ్వసు |
చిరాదభక్తాః ఖలు తే మహీసురాః
కథం హి భక్తం త్వయి తైః సమర్ప్యతే || ౬౧-౪ ||
నివేదయధ్వం గృహిణీజనాయ మాం
దిశేయురన్నం కరుణాకులా ఇమాః |
ఇతి స్మితార్ద్రం భవతేరితా గతా-
స్తే దారకా దారజనం యయాచిరే || ౬౧-౫ ||
గృహీతనామ్ని త్వయి సంభ్రమాకులా-
శ్చతుర్విధం భోజ్యరసం ప్రగృహ్య తాః |
చిరం ధృతత్వత్ప్రవిలోకనాగ్రహాః
స్వకైర్నిరుద్ధా అపి తూర్ణమాయయుః || ౬౧-౬ ||
విలోలపిఞ్ఛం చికురే కపోలయోః
సముల్లసత్కుణ్డలమార్ద్రమీక్షితే |
నిధాయ బాహుం సుహృదంససీమని
స్థితం భవన్తం సమలోకయన్త తాః || ౬౧-౭ ||
తదా చ కాచిత్త్వదుపాగమోద్యతా
గృహీతహస్తా దయితేన యజ్వనా |
తదైవ సఞ్చిన్త్య భవన్తమఞ్జసా
వివేశ కైవల్యమహో కృతిన్యసౌ || ౬౧-౮ ||
ఆదాయ భోజ్యాన్యనుగృహ్య తాః పున-
స్త్వదఙ్గసఙ్గస్పృహయోజ్ఝతీర్గృహమ్ |
విలోక్య యజ్ఞాయ విసర్జయన్నిమా-
శ్చకర్థ భర్తృనపి తాస్వగర్హణాన్ || ౬౧-౯ ||
నిరూప్య దోషం నిజమఙ్గనాజనే
విలోక్య భక్తిం చ పునర్విచారిభిః |
ప్రబుద్ధతత్త్వైస్త్వమభిష్టుతో ద్విజై-
ర్మరుత్పురాధీశ నిరున్ధి మే గదాన్ || ౬౧-౧౦ ||
ఇతి ఏకషష్టితమదశకం సమాప్తమ్ |
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.