Read in తెలుగు / ಕನ್ನಡ / தமிழ் / English (IAST)
ತ್ರಿನವತಿತಮದಶಕಮ್ (೯೩) – ಪಞ್ಚವಿಂಶತಿ ಗುರವಃ |
ಬನ್ಧುಸ್ನೇಹಂ ವಿಜಹ್ಯಾಂ ತವ ಹಿ ಕರುಣಯಾ ತ್ವಯ್ಯುಪಾವೇಶಿತಾತ್ಮಾ
ಸರ್ವಂ ತ್ಯಕ್ತ್ವಾ ಚರೇಯಂ ಸಕಲಮಪಿ ಜಗದ್ವೀಕ್ಷ್ಯ ಮಾಯಾವಿಲಾಸಮ್ |
ನಾನಾತ್ವಾದ್ಭ್ರಾನ್ತಿಜನ್ಯಾತ್ಸತಿ ಖಲು ಗುಣದೋಷಾವಬೋಧೇ ವಿಧಿರ್ವಾ
ವ್ಯಾಸೇಧೋ ವಾ ಕಥಂ ತೌ ತ್ವಯಿ ನಿಹಿತಮತೇರ್ವೀತವೈಷಮ್ಯಬುದ್ಧೇಃ || ೯೩-೧ ||
ಕ್ಷುತ್ತೃಷ್ಣಾಲೋಪಮಾತ್ರೇ ಸತತಕೃತಧಿಯೋ ಜನ್ತವಃ ಸನ್ತ್ಯನನ್ತಾ-
ಸ್ತೇಭ್ಯೋ ವಿಜ್ಞಾನವತ್ತ್ವಾತ್ಪುರುಷ ಇಹ ವರಸ್ತಜ್ಜನಿರ್ದುರ್ಲಭೈವ |
ತತ್ರಾಪ್ಯಾತ್ಮಾಽಽತ್ಮನಃ ಸ್ಯಾತ್ಸುಹೃದಪಿ ಚ ರಿಪುರ್ಯಸ್ತ್ವಯಿ ನ್ಯಸ್ತಚೇತಾ-
ಸ್ತಾಪೋಚ್ಛಿತ್ತೇರುಪಾಯಂ ಸ್ಮರತಿ ಸ ಹಿ ಸುಹೃತ್ಸ್ವಾತ್ಮವೈರೀ ತತೋಽನ್ಯಃ || ೯೩-೨ ||
ತ್ವತ್ಕಾರುಣ್ಯೇ ಪ್ರವೃತ್ತೇ ಕ ಇವ ನ ಹಿ ಗುರುರ್ಲೋಕವೃತ್ತೇಽಪಿ ಭೂಮನ್
ಸರ್ವಾಕ್ರಾನ್ತಾಪಿ ಭೂಮಿರ್ನ ಹಿ ಚಲತಿ ತತಃ ಸತ್ಕ್ಷಮಾಂ ಶಿಕ್ಷಯೇಯಮ್ |
ಗೃಹ್ಣೀಯಾಮೀಶ ತತ್ತದ್ವಿಷಯಪರಿಚಯೇಽಪ್ಯಪ್ರಸಕ್ತಿಂ ಸಮೀರಾತ್-
ವ್ಯಾಪ್ತತ್ವಞ್ಚಾತ್ಮನೋ ಮೇ ಗಗನಗುರುವಶಾದ್ಭಾತು ನಿರ್ಲೇಪತಾ ಚ || ೯೩-೩ ||
ಸ್ವಚ್ಛಃ ಸ್ಯಾಂ ಪಾವನೋಽಹಂ ಮಧುರ ಉದಕವದ್ವಹ್ನಿವನ್ಮಾ ಸ್ಮ ಗೃಹ್ಣಾಂ
ಸರ್ವಾನ್ನೀನೋಽಪಿ ದೋಷಂ ತರುಷು ತಮಿವ ಮಾಂ ಸರ್ವಭೂತೇಷ್ವವೇಯಾಮ್ |
ಪುಷ್ಟಿರ್ನಷ್ಟಿಃ ಕಲಾನಾಂ ಶಶಿನ ಇವ ತನೋರ್ನಾತ್ಮನೋಽಸ್ತೀತಿ ವಿದ್ಯಾಂ
ತೋಯಾದಿವ್ಯಸ್ತಮಾರ್ತಾಣ್ಡವದಪಿ ಚ ತನುಷ್ವೇಕತಾಂ ತ್ವತ್ಪ್ರಸಾದಾತ್ || ೯೩-೪ ||
ಸ್ನೇಹಾದ್ವ್ಯಾಧಾಸ್ತಪುತ್ರಪ್ರಣಯಮೃತಕಪೋತಾಯಿತೋ ಮಾ ಸ್ಮ ಭೂವಂ
ಪ್ರಾಪ್ತಂ ಪ್ರಾಶ್ನನ್ಸಹೇಯ ಕ್ಷುಧಮಪಿ ಶಯುವತ್ಸಿನ್ಧುವತ್ಸ್ಯಾಮಗಾಧಃ |
ಮಾ ಪಪ್ತಂ ಯೋಷಿದಾದೌ ಶಿಖಿನಿ ಶಲಭವದ್ಭೃಙ್ಗವತ್ಸಾರಭಾಗೀ
ಭೂಯಾಸಂ ಕಿನ್ತು ತದ್ವದ್ಧನಚಯನವಶಾನ್ಮಾಹಮೀಶ ಪ್ರಣೇಶಮ್ || ೯೩-೫ ||
ಮಾ ಬದ್ಧ್ಯಾಸಂ ತರುಣ್ಯಾ ಗಜ ಇವ ವಶಯಾ ನಾರ್ಜಯೇಯಂ ಧನೌಘಂ
ಹರ್ತಾನ್ಯಸ್ತಂ ಹಿ ಮಾಧ್ವೀಹರ ಇವ ಮೃಗವನ್ಮಾ ಮುಹಂ ಗ್ರಾಮ್ಯಗೀತೈಃ |
ನಾತ್ಯಾಸಜ್ಜೇಯ ಭೋಜ್ಯೇ ಝಷ ಇವ ಬಲಿಶೇ ಪಿಙ್ಗಲಾವನ್ನಿರಾಶಃ [** ಬಡಿಶೇ **]
ಸುಪ್ಯಾಂ ಭರ್ತವ್ಯಯೋಗಾತ್ಕುರರ ಇವ ವಿಭೋ ಸಾಮಿಷೋಽನ್ಯೈರ್ನ ಹನ್ಯೈ || ೯೩-೬ ||
ವರ್ತೇಯ ತ್ಯಕ್ತಮಾನಃ ಸುಖಮತಿಶಿಶುವನ್ನಿಸ್ಸಹಾಯಶ್ಚರೇಯಂ
ಕನ್ಯಾಯಾ ಏಕಶೇಷೋ ವಲಯ ಇವ ವಿಭೋ ವರ್ಜಿತಾನ್ಯೋನ್ಯಘೋಷಃ |
ತ್ವಚ್ಚಿತ್ತೋ ನಾವಬುಧ್ಯೈ ಪರಮಿಷುಕೃದಿವ ಕ್ಷ್ಮಾಭೃದಾಯಾನಘೋಷಂ
ಗೇಹೇಷ್ವನ್ಯಪ್ರಣೀತೇಷ್ವಹಿರಿವ ನಿವಸಾನ್ಯುನ್ದುರೋರ್ಮನ್ದಿರೇಷು || ೯೩-೭ ||
ತ್ವಯ್ಯೇವ ತ್ವತ್ಕೃತಂ ತ್ವಂ ಕ್ಷಪಯಸಿ ಜಗದಿತ್ಯೂರ್ಣನಾಭಾತ್ಪ್ರತೀಯಾಂ
ತ್ವಚ್ಚಿನ್ತಾ ತ್ವತ್ಸ್ವರೂಪಂ ಕುರುತ ಇತಿ ದೃಢಂ ಶಿಕ್ಷೇಯೇ ಪೇಶಕಾರಾತ್ |
ವಿಡ್ಭಸ್ಮಾತ್ಮಾ ಚ ದೇಹೋ ಭವತಿ ಗುರುವರೋ ಯೋ ವಿವೇಕಂ ವಿರಕ್ತಿಂ
ಧತ್ತೇ ಸಞ್ಚಿನ್ತ್ಯಮಾನೋ ಮಮ ತು ಬಹುರುಜಾಪೀಡಿತೋಽಯಂ ವಿಶೇಷಾತ್ || ೯೩-೮ ||
ಹೀ ಹೀ ಮೇ ದೇಹಮೋಹಂ ತ್ಯಜ ಪವನಪುರಾಧೀಶ ಯತ್ಪ್ರೇಮಹೇತೋ-
ರ್ಗೇಹೇ ವಿತ್ತೇ ಕಲತ್ರಾದಿಷು ಚ ವಿವಶಿತಾಸ್ತ್ವತ್ಪದಂ ವಿಸ್ಮರನ್ತಿ |
ಸೋಽಯಂ ವಹ್ನೇಃ ಶುನೋ ವಾ ಪರಮಿಹ ಪರತಃ ಸಾಮ್ಪ್ರತಞ್ಚಾಕ್ಷಿಕರ್ಣ-
ತ್ವಗ್ಜಿಹ್ವಾದ್ಯಾ ವಿಕರ್ಷನ್ತ್ಯವಶಮತ ಇತಃ ಕೋಽಪಿ ನ ತ್ವತ್ಪದಾಬ್ಜೇ || ೯೩-೯ ||
ದುರ್ವಾರೋ ದೇಹಮೋಹೋ ಯದಿ ಪುನರಧುನಾ ತರ್ಹಿ ನಿಶ್ಶೇಷರೋಗಾನ್
ಹೃತ್ವಾ ಭಕ್ತಿಂ ದ್ರಢಿಷ್ಠಾಂ ಕುರು ತವ ಪದಪಙ್ಕೇರುಹೇ ಪಙ್ಕಜಾಕ್ಷ |
ನೂನಂ ನಾನಾಭವಾನ್ತೇ ಸಮಧಿಗತಮಿಮಂ ಮುಕ್ತಿದಂ ವಿಪ್ರದೇಹಂ
ಕ್ಷುದ್ರೇ ಹಾ ಹನ್ತ ಮಾ ಮಾ ಕ್ಷಿಪ ವಿಷಯರಸೇ ಪಾಹಿ ಮಾಂ ಮಾರುತೇಶ || ೯೩-೧೦ ||
ಇತಿ ತ್ರಿನವತಿತಮದಶಕಂ ಸಮಾಪ್ತಮ್ |
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.