Read in తెలుగు / ಕನ್ನಡ / தமிழ் / देवनागरी / English (IAST)
ಋಷಿರುವಾಚ |
ನಂದಾ ಭಗವತೀ ನಾಮ ಯಾ ಭವಿಷ್ಯತಿ ನಂದಜಾ |
ಸಾ ಸ್ತುತಾ ಪೂಜಿತಾ ಭಕ್ತ್ಯಾ ವಶೀಕುರ್ಯಾಜ್ಜಗತ್ತ್ರಯಮ್ || ೧ || [ಧ್ಯಾತಾ]
ಕನಕೋತ್ತಮಕಾಂತಿಃ ಸಾ ಸುಕಾಂತಿಕನಕಾಂಬರಾ |
ದೇವೀ ಕನಕವರ್ಣಾಭಾ ಕನಕೋತ್ತಮಭೂಷಣಾ || ೨ ||
ಕಮಲಾಂಕುಶಪಾಶಾಬ್ಜೈರಲಂಕೃತಚತುರ್ಭುಜಾ |
ಇಂದಿರಾ ಕಮಲಾ ಲಕ್ಷ್ಮೀಃ ಸಾ ಶ್ರೀರುಕ್ಮಾಂಬುಜಾಸನಾ || ೩ ||
ಯಾ ರಕ್ತದಂತಿಕಾ ನಾಮ ದೇವೀ ಪ್ರೋಕ್ತಾ ಮಯಾನಘ |
ತಸ್ಯಾಃ ಸ್ವರೂಪಂ ವಕ್ಷ್ಯಾಮಿ ಶೃಣು ಸರ್ವಭಯಾಪಹಮ್ || ೪ ||
ರಕ್ತಾಂಬರಾ ರಕ್ತವರ್ಣಾ ರಕ್ತಸರ್ವಾಂಗಭೂಷಣಾ |
ರಕ್ತಾಯುಧಾ ರಕ್ತನೇತ್ರಾ ರಕ್ತಕೇಶಾತಿಭೀಷಣಾ || ೫ ||
ರಕ್ತತೀಕ್ಷ್ಣನಖಾ ರಕ್ತದಶನಾ ರಕ್ತದಂತಿಕಾ |
ಪತಿಂ ನಾರೀವಾನುರಕ್ತಾ ದೇವೀ ಭಕ್ತಂ ಭಜೇಜ್ಜನಮ್ || ೬ ||
ವಸುಧೇವ ವಿಶಾಲಾ ಸಾ ಸುಮೇರುಯುಗಲಸ್ತನೀ |
ದೀರ್ಘೌ ಲಂಬಾವತಿಸ್ಥೂಲೌ ತಾವತೀವಮನೋಹರೌ || ೭ ||
ಕರ್ಕಶಾವತಿಕಾಂತೌ ತೌ ಸರ್ವಾನಂದಪಯೋನಿಧೀ |
ಭಕ್ತಾನ್ ಸಂಪಾಯಯೇದ್ದೇವೀ ಸರ್ವಕಾಮದುಘೌ ಸ್ತನೌ || ೮ ||
ಖಡ್ಗಂ ಪಾತ್ರಂ ಚ ಮುಸಲಂ ಲಾಂಗಲಂ ಚ ಬಿಭರ್ತಿ ಸಾ |
ಆಖ್ಯಾತಾ ರಕ್ತಚಾಮುಂಡಾ ದೇವೀ ಯೋಗೇಶ್ವರೀತಿ ಚ || ೯ ||
ಅನಯಾ ವ್ಯಾಪ್ತಮಖಿಲಂ ಜಗತ್ ಸ್ಥಾವರಜಂಗಮಮ್ |
ಇಮಾಂ ಯಃ ಪೂಜಯೇದ್ಭಕ್ತ್ಯಾ ಸ ವ್ಯಾಪ್ನೋತಿ ಚರಾಚರಮ್ || ೧೦ ||
ಅಧೀತೇ ಯ ಇಮಂ ನಿತ್ಯಂ ರಕ್ತದಂತ್ಯಾ ವಪುಃ ಸ್ತವಮ್ |
ತಂ ಸಾ ಪರಿಚರೇದ್ದೇವೀ ಪತಿಂ ಪ್ರಿಯಮಿವಾಂಗನಾ || ೧೧ ||
ಶಾಕಂಭರೀ ನೀಲವರ್ಣಾ ನೀಲೋತ್ಪಲವಿಲೋಚನಾ |
ಗಂಭೀರನಾಭಿಸ್ತ್ರಿವಲೀವಿಭೂಷಿತತನೂದರೀ || ೧೨ ||
ಸುಕರ್ಕಶಸಮೋತ್ತುಂಗವೃತ್ತಪೀನಘನಸ್ತನೀ |
ಮುಷ್ಟಿಂ ಶಿಲೀಮುಖಾಪೂರ್ಣಂ ಕಮಲಂ ಕಮಲಾಲಯಾ || ೧೩ ||
ಪುಷ್ಪಪಲ್ಲವಮೂಲಾದಿಫಲಾಢ್ಯಂ ಶಾಕಸಂಚಯಮ್ |
ಕಾಮ್ಯಾನಂತರಸೈರ್ಯುಕ್ತಂ ಕ್ಷುತ್ತೃಣ್ಮೃತ್ಯುಜರಾಪಹಮ್ || ೧೪ ||
ಕಾರ್ಮುಕಂ ಚ ಸ್ಫುರತ್ಕಾಂತಿ ಬಿಭ್ರತೀ ಪರಮೇಶ್ವರೀ |
ಶಾಕಂಭರೀ ಶತಾಕ್ಷೀ ಸಾ ಸೈವ ದುರ್ಗಾ ಪ್ರಕೀರ್ತಿತಾ || ೧೫ ||
ವಿಶೋಕಾ ದುಷ್ಟದಮನೀ ಶಮನೀ ದುರಿತಾಪದಾಮ್ |
ಉಮಾ ಗೌರೀ ಸತೀ ಚಂಡೀ ಕಾಲಿಕಾ ಸಾ ಚ ಪಾರ್ವತೀ || ೧೬ ||
ಶಾಕಂಭರೀಂ ಸ್ತುವನ್ ಧ್ಯಾಯನ್ ಜಪನ್ ಸಂಪೂಜಯನ್ನಮನ್ |
ಅಕ್ಷಯ್ಯಮಶ್ನುತೇ ಶೀಘ್ರಮನ್ನಪಾನಾಮೃತಂ ಫಲಮ್ || ೧೭ ||
ಭೀಮಾಪಿ ನೀಲವರ್ಣಾ ಸಾ ದಂಷ್ಟ್ರಾದಶನಭಾಸುರಾ |
ವಿಶಾಲಲೋಚನಾ ನಾರೀ ವೃತ್ತಪೀನಘನಸ್ತನೀ || ೧೮ ||
ಚಂದ್ರಹಾಸಂ ಚ ಡಮರುಂ ಶಿರಃಪಾತ್ರಂ ಚ ಬಿಭ್ರತೀ |
ಏಕವೀರಾ ಕಾಲರಾತ್ರಿಃ ಸೈವೋಕ್ತಾ ಕಾಮದಾ ಸ್ತುತಾ || ೧೯ ||
ತೇಜೋಮಂಡಲದುರ್ಧರ್ಷಾ ಭ್ರಾಮರೀ ಚಿತ್ರಕಾಂತಿಭೃತ್ |
ಚಿತ್ರಾನುಲೇಪನಾ ದೇವೀ ಚಿತ್ರಾಭರಣಭೂಷಿತಾ || ೨೦ ||
ಚಿತ್ರಭ್ರಮರಪಾಣಿಃ ಸಾ ಮಹಾಮಾರೀತಿ ಗೀಯತೇ |
ಇತ್ಯೇತಾ ಮೂರ್ತಯೋ ದೇವ್ಯಾ ವ್ಯಾಖ್ಯಾತಾ ವಸುಧಾಧಿಪ || ೨೧ ||
ಜಗನ್ಮಾತುಶ್ಚಂಡಿಕಾಯಾಃ ಕೀರ್ತಿತಾಃ ಕಾಮಧೇನವಃ |
ಇದಂ ರಹಸ್ಯಂ ಪರಮಂ ನ ವಾಚ್ಯಂ ಕಸ್ಯಚಿತ್ತ್ವಯಾ || ೨೨ ||
ವ್ಯಾಖ್ಯಾನಂ ದಿವ್ಯಮೂರ್ತೀನಾಮಭೀಷ್ಟಫಲದಾಯಕಮ್ |
ತಸ್ಮಾತ್ ಸರ್ವಪ್ರಯತ್ನೇನ ದೇವೀಂ ಜಪ ನಿರಂತರಮ್ || ೨೩ ||
ಸಪ್ತಜನ್ಮಾರ್ಜಿತೈರ್ಘೋರೈರ್ಬ್ರಹ್ಮಹತ್ಯಾಸಮೈರಪಿ |
ಪಾಠಮಾತ್ರೇಣ ಮಂತ್ರಾಣಾಂ ಮುಚ್ಯತೇ ಸರ್ವಕಿಲ್ಬಿಷೈಃ || ೨೪ ||
ದೇವ್ಯಾ ಧ್ಯಾನಂ ಮಯಾ ಖ್ಯಾತಂ ಗುಹ್ಯಾದ್ಗುಹ್ಯತರಂ ಮಹತ್ |
ತಸ್ಮಾತ್ ಸರ್ವಪ್ರಯತ್ನೇನ ಸರ್ವಕಾಮಫಲಪ್ರದಮ್ || ೨೫ ||
ಇತಿ ಮೂರ್ತಿರಹಸ್ಯಂ ಸಂಪೂರ್ಣಮ್ |
ಸಂಪೂರ್ಣ ದುರ್ಗಾ ಸಪ್ತಶತೀ ನೋಡಿ.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.