Read in తెలుగు / ಕನ್ನಡ / தமிழ் / देवनागरी / English (IAST)
<< శ్రీమద్దేవీభాగవతే ద్వాదశస్కంధే అష్టమోఽధ్యాయః
(బ్రాహ్మణాదీనాం గాయత్రీభిన్నాన్యదేవోపాసనాశ్రద్ధాహేతునిరూపణమ్)
వ్యాస ఉవాచ |
కదాచిదథ కాలే తు దశపంచ సమా విభో |
ప్రాణినాం కర్మవశతో న వవర్ష శతక్రతుః || ౧ ||
అనావృష్ట్యాఽతిదుర్భిక్షమభవత్ క్షయకారకమ్ |
గృహే గృహే శవానాం తు సంఖ్యా కర్తుం న శక్యతే || ౨ ||
కేచిదశ్వాన్వరాహాన్వా భక్షయంతి క్షుధార్దితాః |
శవాని చ మనుష్యాణాం భక్షయంత్యపరే జనాః || ౩ ||
బాలకం బాలజననీ స్త్రియం పురుష ఏవ చ |
భక్షితుం చలితాః సర్వే క్షుధయా పీడితా నరాః || ౪ ||
బ్రాహ్మణా బహవస్తత్ర విచారం చక్రురుత్తమమ్ |
తపోధనో గౌతమోఽస్తి స నః ఖేదం హరిష్యతి || ౫ ||
సర్వైర్మిలిత్వా గంతవ్యం గౌతమస్యాశ్రమేఽధునా |
గాయత్రీజపసంసక్తగౌతమస్యాశ్రమేఽధునా || ౬ ||
సుభిక్షం శ్రూయతే తత్ర ప్రాణినో బహవో గతాః |
ఏవం విమృశ్య భూదేవాః సాగ్నిహోత్రాః కుటుంబినః || ౭ ||
సగోధనాః సదాసాశ్చ గౌతమస్యాశ్రమం యయుః |
పూర్వదేశాద్యయుః కేచిత్కేచిద్దక్షిణదేశతః || ౮ ||
పాశ్చాత్యా ఔత్తరాహాశ్చ నానాదిగ్భ్యః సమాయయుః |
దృష్ట్వా సమాజం విప్రాణాం ప్రణనామ స గౌతమః || ౯ ||
ఆసనాద్యుపచారైశ్చ పూజయామాస వాడవాన్ |
చకార కుశలప్రశ్నం తతశ్చాగమకారణమ్ || ౧౦ ||
తే సర్వే స్వస్వవృత్తాంతం కథయామాసురుత్స్మయాః |
దృష్ట్వా తాన్ దుఃఖితాన్ విప్రానభయం దత్తవాన్ మునిః || ౧౧ ||
యుష్మాకమేతత్ సదనం భవద్దాసోఽస్మి సర్వథా |
కా చింతా భవతాం విప్రా మయి దాసే విరాజతి || ౧౨ ||
ధన్యోఽహమస్మిన్ సమయే యూయం సర్వే తపోధనాః |
యేషాం దర్శనమాత్రేణ దుష్కృతం సుకృతాయతే || ౧౩ ||
తే సర్వే పాదరజసా పావయంతి గృహం మమ |
కో మదన్యో భవేద్ధన్యో భవతాం సమనుగ్రహాత్ || ౧౪ ||
స్థేయం సర్వైః సుఖేనైవ సంధ్యాజపపరాయణైః |
వ్యాస ఉవాచ |
ఇతి సర్వాన్ సమాశ్వాస్య గౌతమో మునిరాట్ తతః || ౧౫ ||
గాయత్రీం ప్రార్థయామాస భక్తిసన్నతకంధరః |
నమో దేవి మహావిద్యే వేదమాతః పరాత్పరే || ౧౬ ||
వ్యాహృత్యాదిమహామంత్రరూపే ప్రణవరూపిణి |
సామ్యావస్థాత్మికే మాతర్నమో హ్రీంకారరూపిణి || ౧౭ ||
స్వాహాస్వధాస్వరూపే త్వాం నమామి సకలార్థదామ్ |
భక్తకల్పలతాం దేవీమవస్థాత్రయసాక్షిణీమ్ || ౧౮ ||
తుర్యాతీతస్వరూపాం చ సచ్చిదానందరూపిణీమ్ |
సర్వవేదాంతసంవేద్యాం సూర్యమండలవాసినీమ్ || ౧౯ ||
ప్రాతర్బాలాం రక్తవర్ణాం మధ్యాహ్నే యువతీం పరామ్ |
సాయాహ్నే కృష్ణవర్ణాం తాం వృద్ధాం నిత్యం నమామ్యహమ్ || ౨౦ ||
సర్వభూతారణే దేవి క్షమస్వ పరమేశ్వరి |
ఇతి స్తుతా జగన్మాతా ప్రత్యక్షం దర్శనం దదౌ || ౨౧ ||
పూర్ణపాత్రం దదౌ తస్మై యేన స్యాత్ సర్వపోషణమ్ |
ఉవాచ మునిమంబా సా యం యం కామం త్వమిచ్ఛసి || ౨౨ ||
తస్య పూర్తికరం పాత్రం మయా దత్తం భవిష్యతి |
ఇత్యుక్త్వాంతర్దధే దేవీ గాయత్రీ పరమా కళా || ౨౩ ||
అన్నానాం రాశయస్తస్మానిర్గతాః పర్వతోపమాః |
షడ్రసా వివిధా రాజంస్తృణాని వివిధాని చ || ౨౪ ||
భూషణాని చ దివ్యాని క్షౌమాణి వసనాని చ |
యజ్ఞానాం చ సమారంభాః పాత్రాణి వివిధాని చ || ౨౫ ||
యద్యదిష్టమభూద్రాజన్ మునేస్తస్య మహాత్మనః |
తత్సర్వం నిర్గతం తస్మాద్గాయత్రీపూర్ణపాత్రతః || ౨౬ ||
అథాహూయ మునీన్ సర్వాన్మునిరాడ్గౌతమస్తదా |
ధనం ధాన్యం భూషణాని వసనాని దదౌ ముదా || ౨౭ ||
గోమహిష్యాదిపశవో నిర్గతాః పూర్ణపాత్రతః |
నిర్గతాన్ యజ్ఞసంభారాన్ స్రుక్ స్రువప్రభృతీన్ దదౌ || ౨౮ ||
తే సర్వే మిలితా యజ్ఞాంశ్చక్రిరే మునివాక్యతః |
స్థానం తదేవ భూయిష్ఠమభవత్ స్వర్గసన్నిభమ్ || ౨౯ ||
యత్కించిత్ త్రిషు లోకేషు సుందరం వస్తు దృశ్యతే |
తత్సర్వం తత్ర నిష్పన్నం గాయత్రీదత్తపాత్రతః || ౩౦ ||
దేవాంగనాసమా దారాః శోభంతే భూషణాదిభిః |
మునయో దేవసదృశా వస్త్రచందనభూషణైః || ౩౧ ||
నిత్యోత్సవః ప్రవవృతే మునేరాశ్రమమండలే |
న రోగాదిభయం కించిన్న చ దైత్యభయం క్వచిత్ || ౩౨ ||
స మునేరాశ్రమో జాతః సమంతాచ్ఛతయోజనః |
అన్యే చ ప్రాణినో యేఽపి తేఽపి తత్ర సమాగతాః || ౩౩ ||
తాంశ్చ సర్వాన్ పుపోషాయం దత్త్వాఽభయమథాత్మవాన్ |
నానావిధైర్మహాయజ్ఞైర్విధివత్కల్పితైః సురాః || ౩౪ ||
సంతోషం పరమం ప్రాపుర్మునేశ్చైవ జగుర్యశః |
సభాయాం వృత్రహా భూయో జగౌ శ్లోకం మహాయశాః || ౩౫ ||
అహో అయం నః కిల కల్పపాదపో
మనోరథాన్ పూరయతి ప్రతిష్ఠితః |
నోచేదకాండే క్వ హవిర్వపా వా
సుదుర్లభా యత్ర తు జీవనాశా || ౩౬ ||
ఇత్థం ద్వాదశవర్షాణి పుపోష మునిపుంగవాన్ |
పుత్రవన్మునిరాడ్గర్వగంధేన పరివర్జితః || ౩౭ ||
గాయత్ర్యాః పరమం స్థానం చకార మునిసత్తమః |
యత్ర సర్వైర్మునివరైః పూజ్యతే జగదంబికా || ౩౮ ||
త్రికాలం పరయా భక్త్యా పురశ్చరణకర్మభిః |
అద్యాపి యత్ర దేవీ సా ప్రాతర్బాలా తు దృశ్యతే || ౩౯ ||
మధ్యాహ్నే యువతీ వృద్ధా సాయంకాలే తు దృశ్యతే |
తత్రైకదా సమాయాతో నారదో మునిసత్తమః || ౪౦ ||
రణయన్మహతీం గాయన్ గాయత్ర్యాః పరమాన్ గుణాన్ |
నిషసాద సభామధ్యే మునీనాం భావితాత్మనామ్ || ౪౧ ||
గౌతమాదిభిరత్యుచ్చైః పూజితః శాంతమానసః |
కథాశ్చకార వివిధా యశసో గౌతమస్య చ || ౪౨ ||
బ్రహ్మర్షే దేవసదసి దేవరాట్ తవ యద్యశః |
జగౌ బహువిధం స్వచ్ఛం మునిపోషణజం పరమ్ || ౪౩ ||
శ్రుత్వా శచీపతేర్వాణీం త్వాం ద్రష్టుమహమాగతః |
ధన్యోఽసి త్వం మునిశ్రేష్ఠ జగదంబాప్రసాదతః || ౪౪ ||
ఇత్యుక్త్వా మునివర్యం తం గాయత్రీసదనం యయౌ |
దదర్శ జగదంబాం తాం ప్రేమోత్ఫుల్లవిలోచనః || ౪౫ ||
తుష్టావ విధివద్దేవీం జగామ త్రిదివం పునః |
అథ తత్ర స్థితా యే తే బ్రాహ్మణా మునిపోషితాః || ౪౬ ||
ఉత్కర్షం తు మునేః శ్రుత్వాఽసూయయా ఖేదమాగతాః |
యథాఽస్య న యశో భూయాత్ కర్తవ్యం సర్వథైవ హి || ౪౭ ||
కాలే సమాగతే పశ్చాదితి సర్వైస్తు నిశ్చితమ్ |
తతః కాలేన కియతాఽప్యభూద్వృష్టిర్ధరాతలే || ౪౮ ||
సుభిక్షమభవత్ సర్వదేశేషు నృపసత్తమ |
శ్రుత్వా వార్తాం సుభిక్షస్య మిలితాః సర్వవాడవాః || ౪౯ ||
గౌతమం శప్తుముద్యోగం హా హా రాజన్ ప్రచక్రిరే |
ధన్యౌ తేషాం చ పితరౌ యయోరుత్పత్తిరీదృశీ || ౫౦ ||
కాలస్య మహిమా రాజన్ వక్తుం కేన హి శక్యతే |
గౌర్నిర్మితా మాయయైకా ముమూర్షుర్జరతీ నృప || ౫౧ ||
జగామ సా చ శాలాయాం హోమకాలే మునేస్తదా |
హుంహుంశబ్దైర్వారితా సా ప్రాణాంస్తత్యాజ తత్ క్షణే || ౫౨ ||
గౌర్హతాఽనేన దుష్టేనేత్యేవం తే చుక్రుశుర్ద్విజాః |
హోమం సమాప్య మునిరాడ్విస్మయం పరమం గతః || ౫౩ ||
సమాధిమీలితాక్షః సంశ్చింతయామాస కారణమ్ |
కృతం సర్వం ద్విజైరేతదితి జ్ఞాత్వా తదైవ సః || ౫౪ ||
దధార కోపం పరమం ప్రళయే రుద్రకోపవత్ |
శశాప చ ఋషీన్ సర్వాన్ కోపసంరక్తలోచనః || ౫౫ ||
వేదమాతరి గాయత్ర్యాం తద్ధ్యానే తన్మనోర్జపే |
భవతానున్ముఖా యూయం సర్వథా బ్రాహ్మణాధమాః || ౫౬ ||
వేదే వేదోక్తయజ్ఞేషు తద్వార్తాసు తథైవ చ |
భవతానున్ముఖా యూయం సర్వదా బ్రాహ్మణాధమాః || ౫౭ ||
శివే శివస్య మంత్రే చ శివశాస్త్రే తథైవ చ |
భవతానున్ముఖా యూయం సర్వదా బ్రాహ్మణాధమాః || ౫౮ ||
మూలప్రకృత్యాః శ్రీదేవ్యాస్తద్ధ్యానే తత్కథాసు చ |
భవతానున్ముఖా యూయం సర్వదా బ్రాహ్మణాధమాః || ౫౯ ||
దేవీమంత్రే తథా దేవ్యాః స్థానేఽనుష్ఠానకర్మణి |
భవతానున్ముఖా యూయం సర్వదా బ్రాహ్మణాధమాః || ౬౦ ||
దేవ్యుత్సవదిదృక్షాయాం దేవీనామానుకీర్తనే |
భవతానున్ముఖా యూయం సర్వదా బ్రాహ్మణాధమాః || ౬౧ ||
దేవీభక్తస్య సాన్నిధ్యే దేవీభక్తార్చనే తథా |
భవతానున్ముఖా యూయం సర్వదా బ్రాహ్మణాధమాః || ౬౨ ||
శివోత్సవదిదృక్షాయాం శివభక్తస్య పూజనే |
భవతానున్ముఖా యూయం సర్వదా బ్రాహ్మణాధమాః || ౬౩ ||
రుద్రాక్షం బిల్వపత్రే చ తథా శుద్ధే చ భస్మని |
భవతానున్ముఖా యూయం సర్వదా బ్రాహ్మణాధమాః || ౬౪ ||
శ్రౌతస్మార్తసదాచారే జ్ఞానమార్గే తథైవ చ |
భవతానున్ముఖా యూయం సర్వదా బ్రాహ్మణాధమాః || ౬౫ ||
అద్వైతజ్ఞాననిష్ఠాయాం శాంతిదాంత్యాదిసాధనే |
భవతానున్ముఖా యూయం సర్వదా బ్రాహ్మణాధమాః || ౬౬ ||
నిత్యకర్మాద్యనుష్ఠానేఽప్యగ్నిహోత్రాదిసాధనే |
భవతానున్ముఖా యూయం సర్వదా బ్రాహ్మణాధమాః || ౬౭ ||
స్వాధ్యాయాధ్యయనే చైవ తథా ప్రవచనేఽపి చ |
భవతానున్ముఖా యూయం సర్వదా బ్రాహ్మణాధమాః || ౬౮ ||
గోదానాదిషు దానేషు పితృశ్రాద్ధేషు చైవ హి |
భవతానున్ముఖా యూయం సర్వదా బ్రాహ్మణాధమాః || ౬౯ ||
కృచ్ఛ్రచాంద్రాయణే చైవ ప్రాయశ్చిత్తే తథైవ చ |
భవతానున్ముఖా యూయం సర్వదా బ్రాహ్మణాధమాః || ౭౦ ||
శ్రీదేవీభిన్నదేవేషు శ్రద్ధాభక్తిసమన్వితాః |
శంఖచక్రాద్యంకితాశ్చ భవత బ్రాహ్మణాధమాః || ౭౧ ||
కాపాలికమతాసక్తా బౌద్ధశాస్త్రరతాః సదా |
పాఖండాచారనిరతా భవత బ్రాహ్మణాధమాః || ౭౨ ||
పితృమాతృసుతాభ్రాతృకన్యావిక్రయిణస్తథా |
భార్యావిక్రయిణస్తద్వద్భవత బ్రాహ్మణాధమాః || ౭౩ ||
వేదవిక్రయిణస్తద్వత్తీర్థవిక్రయిణస్తథా |
ధర్మవిక్రయిణస్తద్వద్భవత బ్రాహ్మణాధమాః || ౭౪ ||
పాంచరాత్రే కామశాస్త్రే తథా కాపాలికే మతే |
బౌద్ధే శ్రద్ధాయుతా యూయం భవత బ్రాహ్మణాధమాః || ౭౫ ||
మాతృకన్యాగామినశ్చ భగినీగామినస్తథా |
పరస్త్రీలంపటాః సర్వే భవత బ్రాహ్మణాధమాః || ౭౬ ||
యుష్మాకం వంశజాతాశ్చ స్త్రియశ్చ పురుషాస్తథా |
మద్దత్తశాపదగ్ధాస్తే భవిష్యంతి భవత్సమాః || ౭౭ ||
కిం మయా బహునోక్తేన మూలప్రకృతిరీశ్వరీ |
గాయత్రీ పరమా భూయాద్యుష్మాసు ఖలు కోపితా || ౭౮ ||
అంధకూపాదికుండేషు యుష్మాకం స్యాత్ సదా స్థితిః |
వ్యాస ఉవాచ |
వాగ్దండమీదృశం కృత్వాఽప్యుపస్పృశ్య జలం తతః || ౭౯ ||
జగామ దర్శనార్థం చ గాయత్ర్యాః పరమోత్సుకః |
ప్రణనామ మహాదేవీం సాఽపి దేవీ పరాత్పరా || ౮౦ ||
బ్రాహ్మణానాం కృతిం దృష్ట్వా స్మయం చిత్తే చకార హ |
అద్యాపి తస్యా వదనం స్మయయుక్తం చ దృశ్యతే || ౮౧ ||
ఉవాచ మునివర్యం తం స్మయమానముఖాంబుజా |
భుజంగాయార్పితం దుగ్ధం విషాయైవోపజాయతే || ౮౨ ||
శాంతిం కురు మహాభాగ కర్మణో గతిరీదృశీ |
ఇతి దేవీం ప్రణమ్యాథ తతోఽగాత్స్వాశ్రమం ప్రతి || ౮౩ ||
తతో విప్రైః శాపదగ్ధైర్విస్మృతా వేదరాశయః |
గాయత్రీ విస్మృతా సర్వైస్తదద్భుతమివాభవత్ || ౮౪ ||
తే సర్వేఽథ మిలిత్వా తు పశ్చాత్తాపయుతాస్తథా |
ప్రణేముర్మునివర్యం తం దండవత్ పతితా భువి || ౮౫ ||
నోచుః కించన వాక్యం తు లజ్జయాఽధోముఖాః స్థితాః |
ప్రసీదేతి ప్రసీదేతి ప్రసీదేతి పునః పునః || ౮౬ ||
ప్రార్థయామాసురభితః పరివార్య మునీశ్వరమ్ |
కరుణాపూర్ణహృదయో మునిస్తాన్ సమువాచ హ || ౮౭ ||
కృష్ణావతారపర్యంతం కుంభీపాకే భవేత్ స్థితిః |
న మే వాక్యం మృషా భూయాదితి జానీథ సర్వథా || ౮౮ ||
తతః పరం కలియుగే భువి జన్మ భవేద్ధి వామ్ |
మదుక్తం సర్వమేతత్తు భవేదేవ న చాన్యథా || ౮౯ ||
మచ్ఛాపస్య విమోక్షార్థం యుష్మాకం స్యాద్యదీషణా |
తర్హి సేవ్యం సదా సర్వైర్గాయత్రీపదపంకజమ్ || ౯౦ ||
వ్యాస ఉవాచ |
ఇతి సర్వాన్ విసృజ్యాథ గౌతమో మునిసత్తమః |
ప్రారబ్ధమితి మత్వా తు చిత్తే శాంతిం జగామ హ || ౯౧ ||
ఏతస్మాత్ కారణాద్రాజన్ గతే కృష్ణే తు ధీమతి |
కలౌ యుగే ప్రవృత్తే తు కుంభీపాకాత్తు నిర్గతాః || ౯౨ ||
భువి జాతా బ్రాహ్మణాశ్చ శాపదగ్ధాః పురా తు యే |
సంధ్యాత్రయవిహీనాశ్చ గాయత్రీభక్తివర్జితాః || ౯౩ ||
వేదభక్తివిహీనాశ్చ పాఖండమతగామినః |
అగ్నిహోత్రాదిసత్కర్మస్వధాస్వాహావివర్జితాః || ౯౪ ||
మూలప్రకృతిమవ్యక్తాం నైవ జానంతి కర్హిచిత్ |
తప్తముద్రాంకితాః కేచిత్కామాచారరతాః పరే || ౯౫ ||
కాపాలికాః కౌలికాశ్చ బౌద్ధా జైనాస్తథాపరే |
పండితా అపి తే సర్వే దురాచారప్రవర్తకాః || ౯౬ ||
లంపటాః పరదారేషు దురాచారపరాయణాః |
కుంభీపాకం పునః సర్వే యాస్యంతి నిజకర్మభిః || ౯౭ ||
తస్మాత్ సర్వాత్మనా రాజన్ సంసేవ్యా పరమేశ్వరీ |
న విష్ణూపాసనా నిత్యా న శివోపాసనా తథా || ౯౮ ||
నిత్యా చోపాసనా శక్తేర్యాం వినా తు పతత్యధః |
సర్వముక్తం సమాసేన యత్పృష్టం తత్త్వయాఽనఘ || ౯౯ ||
అతః పరం మణిద్వీపవర్ణనం శృణు సుందరమ్ |
యత్పరం స్థానమాద్యాయా భువనేశ్యా భవారణేః || ౧౦౦ ||
ఇతి శ్రీమద్దేవీభాగవతే మహాపురాణే ద్వాదశస్కంధే బ్రాహ్మణాదీనాం గాయత్రీభిన్నాన్యదేవోపాసనాశ్రద్ధాహేతునిరూపణమ్ నామ నవమోఽధ్యాయః ||
శ్రీమద్దేవీభాగవతే ద్వాదశస్కంధే దశమోఽధ్యాయః >>
మరిన్ని శ్రీ లలితా స్తోత్రాలు చూడండి. మరిన్ని దేవీ స్తోత్రాలు చూడండి.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.