Aranya Kanda Sarga 54 – அரண்யகாண்ட³ சது꞉பஞ்சாஶ꞉ ஸர்க³꞉ (54)

Read in తెలుగు / ಕನ್ನಡ / தமிழ் / देवनागरी / English (IAST)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ சது꞉பஞ்சாஶ꞉ ஸர்க³꞉ (54)

॥ லங்காப்ராபணம் ॥

ஹ்ரியமாணா து வைதே³ஹீ கஞ்சிந்நாத²மபஶ்யதீ ।
த³த³ர்ஶ கி³ரிஶ்ருங்க³ஸ்தா²ந் பஞ்ச வாநரபுங்க³வாந் ॥ 1 ॥

தேஷாம் மத்⁴யே விஶாலாக்ஷீ கௌஶேயம் கநகப்ரப⁴ம் ।
உத்தரீயம் வராரோஹா ஶுபா⁴ந்யாப⁴ரணாநி ச ॥ 2 ॥

முமோச யதி³ ராமாய ஶம்ஸேயுரிதி மைதி²லீ ।
வஸ்த்ரமுத்ஸ்ருஜ்ய தந்மத்⁴யே நிக்ஷிப்தம் ஸஹபூ⁴ஷணம் ॥ 3 ॥

ஸம்ப்⁴ரமாத்து த³ஶக்³ரீவஸ்தத்கர்ம ந ஸ பு³த்³த⁴வாந் ।
பிங்கா³க்ஷாஸ்தாம் விஶாலாக்ஷீம் நேத்ரைரநிமிஷைரிவ ॥ 4 ॥

விக்ரோஶந்தீம் ததா² ஸீதாம் த³த்³ருஶுர்வாநரர்ஷபா⁴꞉ ।
ஸ ச பம்பாமதிக்ரம்ய லங்காமபி⁴முக²꞉ புரீம் ॥ 5 ॥

ஜகா³ம ருத³தீம் க்³ருஹ்ய வைதே³ஹீம் ராக்ஷஸேஶ்வர꞉ ।
தாம் ஜஹார ஸுஸம்ஹ்ருஷ்டோ ராவணோ ம்ருத்யுமாத்மந꞉ ॥ 6 ॥

உத்ஸங்கே³நேவ பு⁴ஜகீ³ம் தீக்ஷ்ணத³ம்ஷ்ட்ராம் மஹாவிஷாம் ।
வநாநி ஸரித꞉ ஶைலாந் ஸராம்ஸி ச விஹாயஸா ॥ 7 ॥

ஸ க்ஷிப்ரம் ஸமதீயாய ஶரஶ்சாபாதி³வ ச்யுத꞉ ।
திமிநக்ரநிகேதம் து வருணாலயமக்ஷயம் ॥ 8 ॥

ஸரிதாம் ஶரணம் க³த்வா ஸமதீயாய ஸாக³ரம் ।
ஸம்ப்⁴ரமாத்பரிவ்ருத்தோர்மீ ருத்³த⁴மீநமஹோரக³꞉ ॥ 9 ॥

வைதே³ஹ்யாம் ஹ்ரியமாணாயாம் ப³பூ⁴வ வருணாலய꞉ ।
அந்தரிக்ஷக³தா வாச꞉ ஸஸ்ருஜுஶ்சாரணாஸ்ததா³ ॥ 10 ॥

ஏதத³ந்தோ த³ஶக்³ரீவ இதி ஸித்³தா⁴ஸ்ததா³(அ)ப்³ருவந் ।
ஸ து ஸீதாம் விவேஷ்டந்தீமங்கேநாதா³ய ராவண꞉ ॥ 11 ॥

ப்ரவிவேஶ புரீம் லங்காம் ரூபிணீம் ம்ருத்யுமாத்மந꞉ ।
ஸோ(அ)பி⁴க³ம்ய புரீம் லங்காம் ஸுவிப⁴க்தமஹாபதா²ம் ॥ 12 ॥

ஸம்ரூட⁴கக்ஷ்யாப³ஹுளம் ஸ்வமந்த꞉புரமாவிஶத் ।
தத்ர தாமஸிதாபாங்கா³ம் ஶோகமோஹபராயணாம் ॥ 13 ॥

நித³தே⁴ ராவண꞉ ஸீதாம் மயோ மாயாமிவ ஸ்த்ரியம் ।
அப்³ரவீச்ச த³ஶக்³ரீவ꞉ பிஶாசீர்கோ⁴ரத³ர்ஶநா꞉ ॥ 14 ॥

யதா² நேமாம் புமாந் ஸ்த்ரீ வா ஸீதாம் பஶ்யத்யஸம்மத꞉ ।
முக்தாமணிஸுவர்ணாநி வஸ்த்ராண்யாப⁴ரணாநி ச ॥ 15 ॥

யத்³யதி³ச்சே²த்ததே³வாஸ்யா தே³யம் மச்ச²ந்த³தோ யதா² ।
யா ச வக்ஷ்யதி வைதே³ஹீம் வசநம் கிஞ்சித³ப்ரியம் ॥ 16 ॥

அஜ்ஞாநாத்³யதி³ வா ஜ்ஞாநாந்ந தஸ்யா ஜீவிதம் ப்ரியம் ।
ததோ²க்த்வா ராக்ஷஸீஸ்தாஸ்து ராக்ஷஸேந்த்³ர꞉ ப்ரதாபவாந் ॥ 17 ॥

நிஷ்க்ரம்யாந்த꞉புராத்தஸ்மாத்கிம் க்ருத்யமிதி சிந்தயந் ।
த³த³ர்ஶாஷ்டௌ மஹாவீர்யாந் ராக்ஷஸாந் பிஶிதாஶநாந் ॥ 18 ॥

ஸ தாந் த்³ருஷ்ட்வா மஹாவீர்யோ வரதா³நேந மோஹித꞉ ।
உவாசைதாநித³ம் வாக்யம் ப்ரஶஸ்ய ப³லவீர்யத꞉ ॥ 19 ॥

நாநாப்ரஹரணா꞉ க்ஷிப்ரமிதோ க³ச்ச²த ஸத்வரா꞉ ।
ஜநஸ்தா²நம் ஹதஸ்தா²நம் பூ⁴தபூர்வம் க²ராளயம் ॥ 20 ॥

தத்ரோஷ்யதாம் ஜநஸ்தா²நே ஶூந்யே நிஹதராக்ஷஸே ।
பௌருஷம் ப³லமாஶ்ரித்ய த்ராஸமுத்ஸ்ருஜ்ய தூ³ரத꞉ ॥ 21 ॥

ப³லம் ஹி ஸுமஹத்³யந்மே ஜநஸ்தா²நே நிவேஶிதம் ।
ஸதூ³ஷணக²ரம் யுத்³தே⁴ ஹதம் ராமேண ஸாயகை꞉ ॥ 22 ॥

தத்ர க்ரோதோ⁴ மமாமர்ஷாத்³தை⁴ர்யஸ்யோபரி வர்ததே ।
வைரம் ச ஸுமஹஜ்ஜாதம் ராமம் ப்ரதி ஸுதா³ருணம் ॥ 23 ॥

நிர்யாதயிதுமிச்சா²மி தச்ச வைரமஹம் ரிபோ꞉ ।
ந ஹி லப்ஸ்யாம்யஹம் நித்³ராமஹத்வா ஸம்யுகே³ ரிபும் ॥ 24 ॥

தம் த்விதா³நீமஹம் ஹத்வா க²ரதூ³ஷணகா⁴திநம் ।
ராமம் ஶர்மோபலப்ஸ்யாமி த⁴நம் லப்³த்⁴வேவ நிர்த⁴ந꞉ ॥ 25 ॥

ஜநஸ்தா²நே வஸத்³பி⁴ஸ்து ப⁴வத்³பீ⁴ ராமமாஶ்ரிதா ।
ப்ரவ்ருத்திருபநேதவ்யா கிம் கரோதீதி தத்த்வத꞉ ॥ 26 ॥

அப்ரமாதா³ச்ச க³ந்தவ்யம் ஸர்வைரபி நிஶாசரை꞉ ।
கர்தவ்யஶ்ச ஸதா³ யத்நோ ராக⁴வஸ்ய வத⁴ம் ப்ரதி ॥ 27 ॥

யுஷ்மாகம் ச ப³லஜ்ஞோ(அ)ஹம் ப³ஹுஶோ ரணமூர்த⁴நி ।
அதஶ்சாஸ்மிந் ஜநஸ்தா²நே மயா யூயம் நியோஜிதா꞉ ॥ 28 ॥

தத꞉ ப்ரியம் வாக்யமுபேத்ய ராக்ஷஸா
மஹார்த²மஷ்டாவபி⁴வாத்³ய ராவணம் ।
விஹாய லங்காம் ஸஹிதா꞉ ப்ரதஸ்தி²ரே
யதோ ஜநஸ்தா²நமலக்ஷ்யத³ர்ஶநா꞉ ॥ 29 ॥

ததஸ்து ஸீதாமுபலப்⁴ய ராவண꞉
ஸுஸம்ப்ரஹ்ருஷ்ட꞉ பரிக்³ருஹ்ய மைதி²லீம் ।
ப்ரஸஜ்ய ராமேண ச வைரமுத்தமம்
ப³பூ⁴வ மோஹாந்முதி³த꞉ ஸ ராக்ஷஸ꞉ ॥ 30 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ சது꞉பஞ்சாஶ꞉ ஸர்க³꞉ ॥ 54 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.