Narayaneeyam Dasakam 9 – ನಾರಾಯಣೀಯಂ ನವಮದಶಕಮ್

Read in తెలుగు / ಕನ್ನಡ / தமிழ் / English (IAST)

ಸ್ತೋತ್ರನಿಧಿ → ನಾರಾಯಣೀಯಂ → ನವಮದಶಕಮ್

<< ನಾರಾಯಣೀಯಂ ಅಷ್ಟಮದಶಕಮ್

ನವಮದಶಕಮ್ (೯) – ಬ್ರಹ್ಮಣಃ ತಪಃ ತಥಾ ಲೋಕಸೃಷ್ಟಿಃ

ಸ್ಥಿತಃ ಸ ಕಮಲೋದ್ಭವಸ್ತವ ಹಿ ನಾಭಿಪಙ್ಕೇರುಹೇ
ಕುತಃ ಸ್ವಿದಿದಮಂಬುಧಾವುದಿತಮಿತ್ಯನಾಲೋಕಯನ್ |
ತದೀಕ್ಷಣಕುತೂಹಲಾತ್ಪ್ರತಿದಿಶಂ ವಿವೃತ್ತಾನನ-
ಶ್ಚತುರ್ವದನತಾಮಗಾದ್ವಿಕಸದಷ್ಟದೃಷ್ಟ್ಯಂಬುಜಾಮ್ || ೯-೧ ||

ಮಹಾರ್ಣವವಿಘೂರ್ಣಿತಂ ಕಮಲಮೇವ ತತ್ಕೇವಲಂ
ವಿಲೋಕ್ಯ ತದುಪಾಶ್ರಯಂ ತವ ತನುಂ ತು ನಾಲೋಕಯನ್ |
ಕ ಏಷ ಕಮಲೋದರೇ ಮಹತಿ ನಿಸ್ಸಹಾಯೋ ಹ್ಯಹಂ
ಕುತಃ ಸ್ವಿದಿದಮಂಬುಜಂ ಸಮಜನೀತಿ ಚಿನ್ತಾಮಗಾತ್ || ೯-೨ ||

ಅಮುಷ್ಯ ಹಿ ಸರೋರುಹಃ ಕಿಮಪಿ ಕಾರಣಂ ಸಂಭವೇ-
ದಿತಿ ಸ್ಮ ಕೃತನಿಶ್ಚಯಃ ಸ ಖಲು ನಾಲರನ್ಧ್ರಾಧ್ವನಾ |
ಸ್ವಯೋಗಬಲವಿದ್ಯಯಾ ಸಮವರೂಢವಾನ್ಪ್ರೌಢಧೀಃ
ತ್ವದೀಯಮತಿಮೋಹನಂ ನ ತು ಕಲೇಬರಂ ದೃಷ್ಟವಾನ್ || ೯-೩ ||

ತತಸ್ಸಕಲನಾಲಿಕಾವಿವರಮಾರ್ಗಗೋ ಮಾರ್ಗಯನ್
ಪ್ರಯಸ್ಯ ಶತವತ್ಸರಂ ಕಿಮಪಿ ನೈವ ಸನ್ದೃಷ್ಟವಾನ್ |
ನಿವೃತ್ಯ ಕಮಲೋದರೇ ಸುಖನಿಷಣ್ಣ ಏಕಾಗ್ರಧೀಃ
ಸಮಾಧಿಬಲಮಾದಧೇ ಭವದನುಗ್ರಹೈಕಾಗ್ರಹೀ || ೯-೪ ||

ಶತೇನ ಪರಿವತ್ಸರೈರ್ದೃಢಸಮಾಧಿಬನ್ಧೋಲ್ಲಸತ್-
ಪ್ರಬೋಧವಿಶದೀಕೃತಃ ಸ ಖಲು ಪದ್ಮಿನೀಸಂಭವಃ |
ಅದೃಷ್ಟಚರಮದ್ಭುತಂ ತವ ಹಿ ರೂಪಮನ್ತರ್ದೃಶಾ
ವ್ಯಚಷ್ಟ ಪರಿತುಷ್ಟಧೀರ್ಭುಜಗಭೋಗಭಾಗಾಶ್ರಯಮ್ || ೯-೫ ||

ಕಿರೀಟಮುಕುಟೋಲ್ಲಸತ್ಕಟಕಹಾರಕೇಯೂರಯುಙ್-
ಮಣಿಸ್ಫುರಿತಮೇಖಲಂ ಸುಪರಿವೀತಪೀತಾಂಬರಮ್ |
ಕಲಾಯಕುಸುಮಪ್ರಭಂ ಗಲತಲೋಲ್ಲಸತ್ಕೌಸ್ತುಭಂ
ವಪುಸ್ತದಯಿ ಭಾವಯೇ ಕಮಲಜನ್ಮನೇ ದರ್ಶಿತಮ್ || ೯-೬ ||

ಶ್ರುತಿಪ್ರಕರದರ್ಶಿತಪ್ರಚುರವೈಭವ ಶ್ರೀಪತೇ
ಹರೇ ಜಯ ಜಯ ಪ್ರಭೋ ಪದಮುಪೈಷಿ ದಿಷ್ಟ್ಯಾ ದೃಶೋಃ |
ಕುರುಷ್ವ ಧಿಯಮಾಶು ಮೇ ಭುವನನಿರ್ಮಿತೌ ಕರ್ಮಠಾ-
ಮಿತಿ ದ್ರುಹಿಣವರ್ಣಿತಸ್ವಗುಣಬಂಹಿಮಾ ಪಾಹಿ ಮಾಮ್ || ೯-೭ ||

ಲಭಸ್ವ ಭುವನತ್ರಯೀರಚನದಕ್ಷತಾಮಕ್ಷತಾಂ
ಗೃಹಾಣ ಮದನುಗ್ರಹಂ ಕುರು ತಪಶ್ಚ ಭೂಯೋ ವಿಧೇ |
ಭವತ್ವಖಿಲಸಾಧನೀ ಮಯಿ ಚ ಭಕ್ತಿರತ್ಯುತ್ಕಟೇ-
ತ್ಯುದೀರ್ಯ ಗಿರಮಾದಧಾ ಮುದಿತಚೇತಸಂ ವೇಧಸಮ್ || ೯-೮ ||

ಶತಂ ಕೃತತಪಾಸ್ತತಃ ಸ ಖಲು ದಿವ್ಯಸಂವತ್ಸರಾ-
ನವಾಪ್ಯ ಚ ತಪೋಬಲಂ ಮತಿಬಲಂ ಚ ಪೂರ್ವಾಧಿಕಮ್ |
ಉದೀಕ್ಷ್ಯ ಕಿಲ ಕಮ್ಪಿತಂ ಪಯಸಿ ಪಙ್ಕಜಂ ವಾಯುನಾ
ಭವದ್ಬಲವಿಜೃಂಭಿತಃ ಪವನಪಾಥಸೀ ಪೀತವಾನ್ || ೯-೯ ||

ತವೈವ ಕೃಪಯಾ ಪುನಃ ಸರಸಿಜೇನ ತೇನೈವ ಸಃ
ಪ್ರಕಲ್ಪ್ಯ ಭುವನತ್ರಯೀಂ ಪ್ರವವೃತೇ ಪ್ರಜಾನಿರ್ಮಿತೌ |
ತಥಾವಿಧಕೃಪಾಭರೋ ಗುರುಮರುತ್ಪುರಾಧೀಶ್ವರ
ತ್ವಮಾಶು ಪರಿಪಾಹಿ ಮಾಂ ಗುರುದಯೋಕ್ಷಿತೈರೀಕ್ಷಿತೈಃ || ೯-೧೦ ||

ಇತಿ ನವಮದಶಕಂ ಸಮಾಪ್ತಮ್ ||

ನಾರಾಯಣೀಯಂ ದಶಮದಶಕಮ್ >>

---

ಸಂಪೂರ್ಣ ನಾರಾಯಣೀಯಂ ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.