Read in తెలుగు / ಕನ್ನಡ / தமிழ் / English (IAST)
<< ನಾರಾಯಣೀಯಂ ತ್ರಿಸಪ್ತತಿತಮದಶಕಮ್
ಚತುಃಸಪ್ತತಿತಮದಶಕಮ್ (೭೪) – ಭಗವತಃ ಮಥುರಾಪುರೀಪ್ರವೇಶಮ್
ಸಮ್ಪ್ರಾಪ್ತೋ ಮಥುರಾಂ ದಿನಾರ್ಧವಿಗಮೇ ತತ್ರಾನ್ತರಸ್ಮಿನ್ವಸ-
ನ್ನಾರಾಮೇ ವಿಹಿತಾಶನಃ ಸಖಿಜನೈರ್ಯಾತಃ ಪುರೀಮೀಕ್ಷಿತುಮ್ |
ಪ್ರಾಪೋ ರಾಜಪಥಂ ಚಿರಶ್ರುತಿಧೃತವ್ಯಾಲೋಕಕೌತೂಹಲ-
ಸ್ತ್ರೀಪುಂಸೋದ್ಯದಗಣ್ಯಪುಣ್ಯನಿಗಲೈರಾಕೃಷ್ಯಮಾಣೋ ನು ಕಿಮ್ || ೭೪-೧ ||
ತ್ವತ್ಪಾದದ್ಯುತಿವತ್ಸರಾಗಸುಭಗಾಸ್ತ್ವನ್ಮೂರ್ತಿವದ್ಯೋಷಿತಃ
ಸಮ್ಪ್ರಾಪ್ತಾ ವಿಲಸತ್ಪಯೋಧರರುಚೋ ಲೋಲಾ ಭವದ್ದೃಷ್ಟಿವತ್ |
ಹಾರಿಣ್ಯಸ್ತ್ವದುರಸ್ಸ್ಥಲೀವದಯಿ ತೇ ಮನ್ದಸ್ಮಿತಪ್ರೌಢಿವ-
ನ್ನೈರ್ಮಲ್ಯೋಲ್ಲಸಿತಾಃ ಕಚೌಘರುಚಿವದ್ರಾಜತ್ಕಲಾಪಾಶ್ರಿತಾಃ || ೭೪-೨ ||
ತಾಸಾಮಾಕಲಯನ್ನಪಾಙ್ಗವಲನೈರ್ಮೋದಂ ಪ್ರಹರ್ಷಾದ್ಭುತ-
ವ್ಯಾಲೋಲೇಷು ಜನೇಷು ತತ್ರ ರಜಕಂ ಕಞ್ಚಿತ್ಪಟೀಂ ಪ್ರಾರ್ಥಯನ್ |
ಕಸ್ತೇ ದಾಸ್ಯತಿ ರಾಜಕೀಯವಸನಂ ಯಾಹೀತಿ ತೇನೋದಿತಃ
ಸದ್ಯಸ್ತಸ್ಯ ಕರೇಣ ಶೀರ್ಷಮಹೃಥಾಃ ಸೋಽಪ್ಯಾಪ ಪುಣ್ಯಾಂ ಗತಿಮ್ || ೭೪-೩ ||
ಭೂಯೋ ವಾಯಕಮೇಕಮಾಯತಮತಿಂ ತೋಷೇಣ ವೇಷೋಚಿತಂ
ದಾಶ್ವಾಂಸಂ ಸ್ವಪದಂ ನಿನೇಥ ಸುಕೃತಂ ಕೋ ವೇದ ಜೀವಾತ್ಮನಾಮ್ |
ಮಾಲಾಭಿಃ ಸ್ತಬಕೈಃ ಸ್ತವೈರಪಿ ಪುನರ್ಮಾಲಾಕೃತಾ ಮಾನಿತೋ
ಭಕ್ತಿಂ ತೇನ ವೃತಾಂ ದಿದೇಶಿಥ ಪರಾಂ ಲಕ್ಷ್ಮೀಂ ಚ ಲಕ್ಷ್ಮೀಪತೇ || ೭೪-೪ ||
ಕುಬ್ಜಾಮಬ್ಜವಿಲೋಚನಾಂ ಪಥಿ ಪುನರ್ದೃಷ್ಟ್ವಾಙ್ಗರಾಗೇ ತಯಾ
ದತ್ತೇ ಸಾಧು ಕಿಲಾಙ್ಗರಾಗಮದದಾಸ್ತಸ್ಯಾ ಮಹಾನ್ತಂ ಹೃದಿ |
ಚಿತ್ತಸ್ಥಾಮೃಜುತಾಮಥ ಪ್ರಥಯಿತುಂ ಗಾತ್ರೇಽಪಿ ತಸ್ಯಾಃ ಸ್ಫುಟಂ
ಗೃಹ್ಣನ್ಮಞ್ಜುಕರೇಣ ತಾಮುದನಯಸ್ತಾವಜ್ಜಗತ್ಸುನ್ದರೀಮ್ || ೭೪-೫ ||
ತಾವನ್ನಿಶ್ಚಿತವೈಭವಾಸ್ತವ ವಿಭೋ ನಾತ್ಯನ್ತಪಾಪಾ ಜನಾ
ಯತ್ಕಿಞ್ಚಿದ್ದದತೇ ಸ್ಮ ಶಕ್ತ್ಯನುಗುಣಂ ತಾಂಬೂಲಮಾಲ್ಯಾದಿಕಮ್ |
ಗೃಹ್ಣಾನಃ ಕುಸುಮಾದಿ ಕಿಞ್ಚನ ತದಾ ಮಾರ್ಗೇ ನಿಬದ್ಧಾಞ್ಜಲಿ-
ರ್ನಾತಿಷ್ಠಂ ಬತ ಹಾ ಯತೋಽದ್ಯ ವಿಪುಲಾಮಾರ್ತಿಂ ವ್ರಜಾಮಿ ಪ್ರಭೋ || ೭೪-೬ ||
ಏಷ್ಯಾಮೀತಿ ವಿಮುಕ್ತಯಾಪಿ ಭಗವನ್ನಾಲೇಪದಾತ್ರ್ಯಾ ತಯಾ
ದೂರಾತ್ಕಾತರಯಾ ನಿರೀಕ್ಷಿತಗತಿಸ್ತ್ವಂ ಪ್ರಾವಿಶೋ ಗೋಪುರಮ್ |
ಆಘೋಷಾನುಮಿತತ್ವದಾಗಮಮಹಾಹರ್ಷೋಲ್ಲಲದ್ದೇವಕೀ-
ವಕ್ಷೋಜಪ್ರಗಲತ್ಪಯೋರಸಮಿಷಾತ್ತ್ವತ್ಕೀರ್ತಿರನ್ತರ್ಗತಾ || ೭೪-೭ ||
ಆವಿಷ್ಟೋ ನಗರೀಂ ಮಹೋತ್ಸವವತೀಂ ಕೋದಣ್ಡಶಾಲಾಂ ವ್ರಜನ್
ಮಾಧುರ್ಯೇಣ ನು ತೇಜಸಾ ನು ಪುರುಷೈರ್ದೂರೇಣ ದತ್ತಾನ್ತರಃ |
ಸ್ರಗ್ಭಿರ್ಭೂಷಿತಮರ್ಚಿತಂ ವರಧನುರ್ಮಾಮೇತಿ ವಾದಾತ್ಪುರಃ
ಪ್ರಾಗೃಹ್ಣಾಃ ಸಮರೋಪಯಃ ಕಿಲ ಸಮಾಕ್ರಾಕ್ಷೀರಭಾಙ್ಕ್ಷೀರಪಿ || ೭೪-೮ ||
ಶ್ವಃ ಕಂಸಕ್ಷಪಣೋತ್ಸವಸ್ಯ ಪುರತಃ ಪ್ರಾರಂಭತೂರ್ಯೋಪಮ-
ಶ್ಚಾಪಧ್ವಂಸಮಹಾಧ್ವನಿಸ್ತವ ವಿಭೋ ದೇವಾನರೋಮಾಞ್ಚಯತ್ |
ಕಂಸಸ್ಯಾಪಿ ಚ ವೇಪಥುಸ್ತದುದಿತಃ ಕೋದಣ್ಡಖಣ್ಡದ್ವಯೀ-
ಚಣ್ಡಾಭ್ಯಾಹತರಕ್ಷಿಪೂರುಷರವೈರುತ್ಕೂಲಿತೋಽಭೂತ್ತ್ವಯಾ || ೭೪-೯ ||
ಶಿಷ್ಟೈರ್ದುಷ್ಟಜನೈಶ್ಚ ದೃಷ್ಟಮಹಿಮಾ ಪ್ರೀತ್ಯಾ ಚ ಭೀತ್ಯಾ ತತಃ
ಸಮ್ಪಶ್ಯನ್ಪುರಸಮ್ಪದಂ ಪ್ರವಿಚರನ್ಸಾಯಂ ಗತೋ ವಾಟಿಕಾಮ್ |
ಶ್ರೀದಾಮ್ನಾ ಸಹ ರಾಧಿಕಾವಿರಹಜಂ ಖೇದಂ ವದನ್ಪ್ರಸ್ವಪ-
ನ್ನಾನನ್ದನ್ನವತಾರಕಾರ್ಯಘಟನಾದ್ವಾತೇಶ ಸಂರಕ್ಷ ಮಾಮ್ || ೭೪-೧೦ ||
ಇತಿ ಚತುಃಸಪ್ತತಿತಮದಶಕಂ ಸಮಾಪ್ತಮ್ |
ನಾರಾಯಣೀಯಂ ಪಞ್ಚಸಪ್ತತಿತಮದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.