Mahanyasam 24. Malapakarshana Snanam – ೨೪) ಮಲಾಪಕರ್ಷಣಸ್ನಾನಮ್

Read in తెలుగు / ಕನ್ನಡ / தமிழ் / देवनागरी / English (IAST)

ಶ್ರೀರುದ್ರಾಯ ನಮಃ ಶುದ್ಧೋದಕೇನ ಸ್ನಪಯಾಮಿ ।

(ತೈ.ಸಂ.೫-೬-೧)
ಹಿರ॑ಣ್ಯವರ್ಣಾ॒: ಶುಚ॑ಯಃ ಪಾವ॒ಕಾ ಯಾಸು॑ ಜಾ॒ತಃ ಕ॒ಶ್ಯಪೋ॒ ಯಾಸ್ವಿನ್ದ್ರ॑: ।
ಅ॒ಗ್ನಿಂ ಯಾ ಗರ್ಭಂ॑ ದಧಿ॒ರೇ ವಿರೂ॑ಪಾ॒ಸ್ತಾ ನ॒ ಆಪ॒: ಶಗ್ಗ್ ಸ್ಯೋ॒ನಾ ಭ॑ವನ್ತು ॥ ೧

// ಹಿರಣ್ಯ-ವರ್ಣಾಃ, ಶುಚಯಃ, ಪಾವಕಾಃ, ಯಸು, ಜಾತಃ, ಕಶ್ಯಪಃ, ಯಾಸು, ಇನ್ದ್ರಃ, ಅಗ್ನಿಂ, ಯಾಃ, ಗರ್ಭಂ, ದಧಿರೇ, ವಿ-ರೂಪಾಃ, ತಾಃ, ನಃ, ಆಪಃ, ಶಂ, ಸ್ಯೋನಾಃ, ಭವನ್ತು //

ಯಾಸಾ॒ಗ್ಂ॒ ರಾಜಾ॒ ವರು॑ಣೋ॒ ಯಾತಿ॒ ಮಧ್ಯೇ॑ ಸತ್ಯಾನೃ॒ತೇ ಅ॑ವ॒ಪಶ್ಯ॒ಞ್ಜನಾ॑ನಾಮ್ ।
ಮ॒ಧು॒ಶ್ಚುತ॒: ಶುಚ॑ಯೋ॒ ಯಾಃ ಪಾ॑ವ॒ಕಾಸ್ತಾ ನ॒ ಆಪ॒: ಶಗ್ಗ್ ಸ್ಯೋ॒ನಾ ಭ॑ವನ್ತು ॥ ೨

// ಯಾಸಾಂ, ರಾಜಾ, ವರುಣಃ, ಯಾತಿ, ಮಧ್ಯೇ, ಸತ್ಯ-ಅನೃತೇ, ಅವ-ಪಶ್ಯನ್, ಜನಾನಾಂ, ಮಧು-ಶ್ಚುತಃ, ಶುಚಯಃ, ಯಾಃ, ಪಾವಕಾಃ, ತಾಃ, ನಃ, ಆಪಃ, ಶಂ, ಸ್ಯೋನಾ, ಭವನ್ತು //

ಯಾಸಾಂ᳚ ದೇ॒ವಾ ದಿ॒ವಿ ಕೃ॒ಣ್ವನ್ತಿ॑ ಭ॒ಕ್ಷಂ ಯಾ ಅ॒ನ್ತರಿ॑ಕ್ಷೇ ಬಹು॒ಧಾ ಭವ॑ನ್ತಿ ।
ಯಾಃ ಪೃ॑ಥಿ॒ವೀಂ ಪಯ॑ಸೋ॒ನ್ದನ್ತಿ॑ ಶು॒ಕ್ರಾಸ್ತಾ ನ॒ ಆಪ॒: ಶಗ್ಗ್ ಸ್ಯೋ॒ನಾ ಭ॑ವನ್ತು ॥ ೩

// ಯಾಸಾಂ, ದೇವಾಃ, ದಿವಿ, ಕೃಣ್ವನ್ತಿ, ಭಕ್ಷಂ, ಯಾಃ, ಅನ್ತರಿಕ್ಷೇ, ಬಹು-ಧಾ, ಭವನ್ತಿ, ಯಾಃ, ಪೃಥಿವೀಂ, ಪಯಸಾ, ಉನ್ದನ್ತಿ, ಶುಕ್ರಾಃ, ತಾಃ, ನಃ, ಆಪಃ, ಶಂ, ಸ್ಯೋನಾ, ಭವನ್ತು //

ಶಿ॒ವೇನ॑ ಮಾ॒ ಚಕ್ಷು॑ಷಾ ಪಶ್ಯತಾಪಃ ಶಿ॒ವಯಾ॑ ತ॒ನುವೋಽಪ॑ ಸ್ಪೃಶತ॒ ತ್ವಚಂ॑ ಮೇ ।
ಸರ್ವಾಗ್ಂ॑ ಅ॒ಗ್ನೀಗ್ಂ ರ॑ಫ್ಸು॒ಷದೋ॑ ಹುವೇ ವೋ॒ ಮಯಿ॒ ವರ್ಚೋ॒ ಬಲ॒ಮೋಜೋ॒ ನಿಧ॑ತ್ತ ॥ ೪

// ಶಿವೇನ, ಮಾ, ಚಕ್ಷುಷಾ, ಪಶ್ಯತ, ಆಪಃ, ಶಿವಯಾ, ತನುವಾ, ಉಪ, ಸ್ಪೃಶತ, ತ್ವಚಂ, ಮೇ, ಸರ್ವಾನ್, ಅಗ್ನೀನ್, ಅಫ್ಸು-ಸದಃ, ಹುವೇ, ವಃ, ಮಯಿ, ವರ್ಚಃ, ಬಲಂ, ಓಜೋ, ನಿ, ಧತ್ತ //

ಯದ॒ದಃ ಸಂ॑ಪ್ರಯ॒ತೀರಹಾ॒ವನ॑ದತಾಹ॒ ತೇ ।
ತಸ್ಮಾ॒ದಾ ನ॒ದ್ಯೋ॑ ನಾಮ॑ ಸ್ಥ॒ ತಾ ವೋ॒ ನಾಮಾ॑ನಿ ಸಿನ್ಧವಃ ॥ ೫

// ಯತ್, ಅದಃ, ಸಂ-ಪ್ರಯತೀಃ, ಅಹೌ, ಅನದತ, ಹತೇ, ತಸ್ಮಾತ್, ಆ, ನದ್ಯಃ, ನಾಮ, ಸ್ಥ, ತಾ, ವಃ, ನಾಮಾನಿ, ಸಿನ್ಧವಃ //

ಯತ್ಪ್ರೇಷಿ॑ತಾ॒ ವರು॑ಣೇ॒ನ ತಾಃ ಶೀಭಗ್ಂ॑ ಸ॒ಮವ॑ಲ್ಗತ ।
ತದಾ᳚ಪ್ನೋ॒ದಿನ್ದ್ರೋ॑ ವೋ ಯ॒ತೀಸ್ತಸ್ಮಾ॒ದಾಪೋ॒ ಅನು॑ಸ್ಥನ ॥ ೬

// ಯತ್, ಪ್ರ-ಇಷಿತಾಃ, ವರುಣೇನ, ತಾಃ, ಶೀಭಂ, ಸಂ-ಅವಲ್ಗತ, ತತ್, ಆಪ್ನೋತ್, ಇನ್ದ್ರಃ, ವಃ, ಯಾತೀಃ, ತಸ್ಮತ್, ಆಪಃ, ಅನು, ಸ್ಥಾನ //

ಅ॒ಪ॒ಕಾ॒ಮಗ್ ಸ್ಯನ್ದ॑ಮಾನಾ॒ ಅವೀ॑ವರತ ವೋ॒ ಹಿ ಕ᳚ಮ್ ।
ಇನ್ದ್ರೋ॑ ವ॒: ಶಕ್ತಿ॑ಭಿರ್ದೇವೀ॒ಸ್ತಸ್ಮಾ॒ದ್ವಾರ್ಣಾಮ॑ ವೋ ಹಿ॒ತಮ್ ॥ ೭

// ಅಪ-ಕಾಮಂ, ಸ್ಯನ್ದಮಾನಾಃ, ಅವೀವರತ, ವಃ, ಹಿಕಂ, ಇನ್ದ್ರಃ, ವಃ, ಶಕ್ತಿ-ಭಿಃ, ದೇವೀಃ, ತಸ್ಮಾತ್, ವಾಃ, ನಾಮ, ವಃ, ಹಿತಂ //

ಏಕೋ॑ ದೇ॒ವೋ ಅಪ್ಯ॑ತಿಷ್ಠ॒ತ್ಸ್ಯನ್ದ॑ಮಾನಾ ಯಥಾವ॒ಶಮ್ ।
ಉದಾ॑ನಿಷುರ್ಮ॒ಹೀರಿತಿ॒ ತಸ್ಮಾ॑ದುದ॒ಕಮು॑ಚ್ಯತೇ ॥ ೮

// ಏಕಃ, ದೇವಃ, ಅಪಿ, ಅತಿಷ್ಠತ್, ಸ್ಯನ್ದಮಾನಾಃ, ಯಥಾ-ವಶಂ, ಉತ್, ಆನುಷುಃ, ಮಹೀಃ, ಇತಿ, ತಸ್ಮಾತ್, ಉದಕಂ, ಉಚ್ಯತೇ //

ಆಪೋ॑ ಭ॒ದ್ರಾ ಘೃ॒ತಮಿದಾಪ॑ ಆಸುರ॒ಗ್ನೀಷೋಮೌ॑ ಬಿಭ್ರ॒ತ್ಯಾ॒ಪ॒ ಇತ್ತಾಃ ।
ತೀ॒ವ್ರೋ ರಸೋ॑ ಮಧು॒ಪೃಚಾಂ॑ ಅ॒ರಂ॒ಗ॒ಮ ಆ ಮಾ᳚ ಪ್ರಾ॒ಣೇನ॑ ಸ॒ಹ ವರ್ಚ॑ಸಾ ಗನ್ ॥ ೯

// ಆಪಃ, ಭದ್ರಾಃ, ಘೃತಂ, ಇತ್, ಆಪಃ, ಆಸುಃ, ಅಗ್ನೀ-ಸೋಮೌ, ಬಿಭ್ರತಿ, ಆಪಃ, ಇತ್, ತಾಃ, ತೀವ್ರಃ, ರಸಃ, ಮಧು-ಪೃಚಾಂ, ಅರಂಗಮಃ, ಆ, ಮಾ, ಪ್ರ-ಅನೇನ, ಸಹ, ವರ್ಚಸಾ, ಗನ್ //

ಆದಿತ್ಪ॑ಶ್ಯಾಮ್ಯು॒ತ ವಾ॑ ಶೃಣೋ॒ಮ್ಯಾ ಮಾ॒ ಘೋಷೋ॑ ಗಚ್ಛತಿ॒ ವಾಙ್ನ॑ ಆಸಾಮ್ ।
ಮನ್ಯೇ॑ ಭೇಜಾ॒ನೋ ಅ॒ಮೃತ॑ಸ್ಯ॒ ತರ್ಹಿ॒ ಹಿರ॑ಣ್ಯವರ್ಣಾ॒ ಅತೃ॑ಪಂ ಯ॒ದಾ ವ॑: ॥ ೧೦

// ಆತ್, ಇತ್, ಪಶ್ಯಾಮಿ, ಉತ, ವಾ, ಶೃಣೋಮಿ, ಆ, ಮಾ, ಘೋಷಃ, ಗಚ್ಛತಿ, ವಾಕ್, ನಃ, ಆಸಾಂ, ಮನ್ಯೇ, ಭೇಜಾನಃ, ಅಮೃತಸ್ಯ, ತರ್ಹಿ, ಹಿರಣ್ಯ-ವರ್ಣಾಃ, ಅತೃಪಂ, ಯದಾ, ವಃ //

ಆಪೋ॒ ಹಿ ಷ್ಠಾ ಮ॑ಯೋ॒ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ ।
ಮ॒ಹೇ ರಣಾ॑ಯ॒ ಚಕ್ಷ॑ಸೇ ॥ ೧೧
ಯೋ ವ॑: ಶಿ॒ವತ॑ಮೋ॒ ರಸ॒ಸ್ತಸ್ಯ॑ ಭಾಜಯತೇ॒ಹ ನ॑: ।
ಉ॒ಶ॒ತೀರಿ॑ವ ಮಾ॒ತ॑ರಃ ॥ ೧೨
ತಸ್ಮಾ॒ ಅರಂ॑ ಗಮಾಮ ವೋ॒ ಯಸ್ಯ॒ ಕ್ಷಯಾ॑ಯ॒ ಜಿನ್ವ॑ಥ ।
ಆಪೋ॑ ಜ॒ನಯ॑ಥಾ ಚ ನಃ ॥ ೧೩

// ಆಪಃ, ಹಿ, ಸ್ಥ, ಮಯಃ-ಭುವಃ, ತಾಃ, ನಃ, ಊರ್ಜೇ, ದಧಾತನ, ಮಹೇ, ರಣಾಯ, ಚಕ್ಷಸೇ, ಯಃ, ವಃ, ಶಿವ-ತಮಃ, ರಸಃ, ತಸ್ಯ, ಭಾಜಯತ, ಇಹ, ನಃ, ಉಶತೀಃ, ಇವ, ಮಾತರಃ, ತಸ್ಮೈ, ಅರಂ, ಗಮಾಮ, ವಃ, ಯಸ್ಯ, ಕ್ಷಯಾಯ, ಜಿನ್ವಥ, ಆಪಃ, ಜನಯಥ, ಚ, ನಃ //

ದಿ॒ವಿ ಶ್ರ॑ಯಸ್ವಾ॒ನ್ತರಿ॑ಕ್ಷೇ ಯತಸ್ವ ಪೃಥಿ॒ವ್ಯಾ ಸಂ ಭ॑ವ ಬ್ರಹ್ಮವರ್ಚ॒ಸಮ॑ಸಿ ಬ್ರಹ್ಮವರ್ಚ॒ಸಾಯ॑ ತ್ವಾ ॥ ೧೪

// ದಿವಿ, ಶ್ರಯಸ್ವ, ಅನ್ತರಿಕ್ಷೇ, ಯತಸ್ವ, ಪೃಥಿವ್ಯಾ, ಸಂ, ಭವ, ಬ್ರಹ್ಮವರ್ಚಸಂ, ಅಸಿ, ಬ್ರಹ್ಮವರ್ಚಸಾಯ, ತ್ವಾ //

(ತೈ.ಸಂ.೫-೬-೨)
ಅ॒ಪಾಂ ಗ್ರಹಾ᳚ನ್ಗೃಹ್ಣಾತ್ಯೇ॒ತದ್ವಾವ ರಾ॑ಜ॒ಸೂಯಂ॒ ಯದೇ॒ತೇ ಗ್ರಹಾ᳚: ಸ॒ವೋ᳚ಽಗ್ನಿರ್ವ॑ರುಣಸ॒ವೋ ರಾ॑ಜ॒ಸೂಯ॑ಮಗ್ನಿಸ॒ವಶ್ಚಿತ್ಯ॒ಸ್ತಾಭ್ಯಾ॑ಮೇ॒ವ ಸೂ॑ಯ॒ತೇಽಥೋ॑ ಉ॒ಭಾವೇ॒ವ ಲೋ॒ಕಾವ॒ಭಿ ಜ॑ಯತಿ॒ ಯಶ್ಚ॑ ರಾಜ॒ಸೂಯೇ॑ನೇಜಾ॒ನಸ್ಯ॒ ಯಶ್ಚಾ᳚ಗ್ನಿ॒ಚಿತ॒ ಆಪೋ॑ ಭವ॒ನ್ತ್ಯಾಪೋ॒ ವಾ ಅ॒ಗ್ನೇರ್ಭ್ರಾತೃ॑ವ್ಯಾ॒ ಯದ॒ಪೋ᳚ಽಗ್ನೇರ॒ಧಸ್ತಾ॑ದುಪ॒ದಧಾ॑ತಿ॒ ಭ್ರಾತೃ॑ವ್ಯಾಭಿಭೂತ್ಯೈ॒ ಭವ॑ತ್ಯಾ॒ತ್ಮನಾ॒ ಪರಾ᳚ಽಸ್ಯ॒ ಭ್ರಾತೃ॑ವ್ಯೋ ಭವತ್ಯ॒ಮೃತಂ॑ ವಾ ಆಪ॒ಸ್ತಸ್ಮಾ॑ದ॒ದ್ಭಿರವ॑ತಾನ್ತಮ॒ಭಿಷಿ॑ಞ್ಚನ್ತಿ॒ ನಾಽಽರ್ತಿ॒ಮಾರ್ಛ॑ತಿ॒ ಸರ್ವ॒ಮಾಯು॑ರೇತಿ॒ ॥

// ಅಪಾಂ, ಗ್ರಹಾನ್, ಗೃಹ್ಣಾತಿ, ಏತತ್, ವಾವ, ರಾಜ-ಸೂಯಂ, ಯತ್, ಏತೇ, ಗ್ರಹಾಃ, ಸವಃ, ಅಗ್ನಿಃ, ವರುಣ-ಸವಃ, ರಾಜ-ಸೂಯಂ, ಅಗ್ನಿ-ಸವಃ, ಚಿತ್ಯಃ, ತಾಭ್ಯಾಂ, ಏವ, ಸೂಯತೇ, ಅಥೋ, ಉಭೌ, ಏವ, ಲೋಕೌ, ಅಭೀತಿ, ಜಯತಿ, ಯಃ, ಚ, ರಾಜ-ಸೂಯೇನ, ಈಜಾನಸ್ಯ, ಯಃ, ಚ, ಅಗ್ನಿ-ಚಿತಃ, ಆಪಃ, ಭವನ್ತಿ, ಆಪಃ, ವೈ, ಅಗ್ನೇಃ, ಭ್ರಾತೃವ್ಯಾಃ, ಯತ್, ಆಪಃ, ಅಗ್ನೇಃ, ಅಧಸ್ತಾತ್, ಉಪ-ದಧಾತಿ, ಭ್ರಾತೃವ್ಯ-ಅಭಿಭೂತ್ಯೈ, ಭವತಿ, ಆತ್ಮನಾ, ಪರಾ, ಅಸ್ಯ, ಭ್ರಾತೃವ್ಯಃ, ಭವತಿ, ಅಮೃತಂ, ವೈ, ಆಪಃ, ತಸ್ಮಾತ್, ಅತ್-ಭಿಃ, ಅವ-ತಾನ್ತಾಂ, ಅಭಿ, ಸಿಞ್ಚನ್ತಿ, ನ, ಆರ್ತಿಂ, ಅ, ಋಚ್ಛತಿ, ಸರ್ವಂ, ಆಯುಃ, ಏತಿ //

(ತೈ.ಬ್ರಾ.೧-೪-೮-೧)
ಪವ॑ಮಾನ॒: ಸುವ॒ರ್ಜನ॑: । ಪ॒ವಿತ್ರೇ॑ಣ॒ ವಿಚ॑ರ್ಷಣಿಃ ।
ಯಃ ಪೋತಾ॒ ಸ ಪು॑ನಾತು ಮಾ । ಪು॒ನನ್ತು॑ ಮಾ ದೇವಜ॒ನಾಃ ।
ಪು॒ನನ್ತು॒ ಮನ॑ವೋ ಧಿ॒ಯಾ । ಪು॒ನನ್ತು॒ ವಿಶ್ವ॑ ಆ॒ಯವ॑: ।
ಜಾತ॑ವೇದಃ ಪ॒ವಿತ್ರ॑ವತ್ । ಪ॒ವಿತ್ರೇ॑ಣ ಪುನಾಹಿ ಮಾ ।
ಶು॒ಕ್ರೇಣ॑ ದೇವ॒ ದೀದ್ಯ॑ತ್ । ಅಗ್ನೇ॒ ಕ್ರತ್ವಾ॒ ಕ್ರತೂ॒ಗ್ಂ॒ ರನು॑ ॥ ೧

ಯತ್ತೇ॑ ಪ॒ವಿತ್ರ॑ಮ॒ರ್ಚಿಷಿ॑ । ಅಗ್ನೇ॒ ವಿತ॑ತಮನ್ತ॒ರಾ ।
ಬ್ರಹ್ಮ॒ ತೇನ॑ ಪುನೀಮಹೇ । ಉ॒ಭಾಭ್ಯಾಂ᳚ ದೇವ ಸವಿತಃ ।
ಪ॒ವಿತ್ರೇ॑ಣ ಸ॒ವೇನ॑ ಚ । ಇ॒ದಂ ಬ್ರಹ್ಮ॑ ಪುನೀಮಹೇ ।
ವೈ॒ಶ್ವ॒ದೇ॒ವೀ ಪು॑ನ॒ತೀ ದೇ॒ವ್ಯಾಗಾ᳚ತ್ ।
ಯಸ್ಯೈ॑ ಬ॒ಹ್ವೀಸ್ತ॒ನುವೋ॑ ವೀ॒ತಪೃ॑ಷ್ಠಾಃ ।
ತಯಾ॒ ಮದ॑ನ್ತಃ ಸಧ॒ ಮಾದ್ಯೇ॑ಷು ।
ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ೨

ವೈ॒ಶ್ವಾ॒ನ॒ರೋ ರ॒ಶ್ಮಿಭಿ॑ರ್ಮಾ ಪುನಾತು ।
ವಾತ॑: ಪ್ರಾ॒ಣೇನೇ॑ಷಿ॒ರೋ ಮ॑ಯೋ॒ಭೂಃ ।
ದ್ಯಾವಾ॑ಪೃಥಿ॒ವೀ ಪಯ॑ಸಾ॒ ಪಯೋ॑ಭಿಃ ।
ಋ॒ತಾವ॑ರೀ ಯ॒ಜ್ಞಿಯೇ॑ ಮಾ ಪುನೀತಾಮ್ ।
ಬೃ॒ಹದ್ಭಿ॑: ಸವಿತ॒ಸ್ತೃಭಿ॑: ।
ವರ್ಷಿ॑ಷ್ಠೈರ್ದೇವ॒ ಮನ್ಮ॑ಭಿಃ ।
ಅಗ್ನೇ॒ ದಕ್ಷೈ᳚: ಪುನಾಹಿ ಮಾ ।
ಯೇನ॑ ದೇ॒ವಾ ಅಪು॑ನತ ।
ಯೇನಾಪೋ॑ ದಿ॒ವ್ಯಂ ಕಶ॑: ।
ತೇನ॑ ದಿ॒ವ್ಯೇನ॒ ಬ್ರಹ್ಮ॑ಣಾ ॥ ೩

ಇ॒ದಂ ಬ್ರಹ್ಮ॑ ಪುನೀಮಹೇ ।
ಯಃ ಪಾ॑ವಮಾ॒ನೀರ॒ದ್ಧ್ಯೇತಿ॑ ।
ಋಷಿ॑ಭಿ॒: ಸಂಭೃ॑ತ॒ಗ್ಂ॒ ರಸ᳚ಮ್ ।
ಸರ್ವ॒ಗ್ಂ॒ ಸ ಪೂ॒ತಮ॑ಶ್ನಾತಿ ।
ಸ್ವ॒ದಿ॒ತಂ ಮಾ॑ತ॒ರಿಶ್ವ॑ನಾ ।
ಪಾ॒ವ॒ಮಾ॒ನೀರ್ಯೋ ಅ॒ಧ್ಯೇತಿ॑ ।
ಋಷಿ॑ಭಿ॒: ಸಂಭೃ॑ತ॒ಗ್ಂ॒ ರಸ᳚ಮ್ ।
ತಸ್ಮೈ॒ ಸರ॑ಸ್ವತೀ ದುಹೇ ।
ಕ್ಷೀ॒ರಗ್ಂ ಸ॒ರ್ಪಿರ್ಮಧೂ॑ದ॒ಕಮ್ ।
ಪಾ॒ವ॒ಮಾ॒ನೀಃ ಸ್ವ॒ಸ್ತ್ಯಯ॑ನೀಃ ॥ ೪

ಸು॒ದುಘಾ॒ ಹಿ ಪಯ॑ಸ್ವತೀಃ ।
ಋಷಿ॑ಭಿ॒: ಸಂಭೃ॑ತೋ॒ ರಸ॑: ।
ಬ್ರಾ॒ಹ್ಮ॒ಣೇಷ್ವ॒ಮೃತಗ್ಂ॑ ಹಿ॒ತಮ್ ।
ಪಾ॒ವ॒ಮಾ॒ನೀರ್ದಿ॑ಶನ್ತು ನಃ ।
ಇ॒ಮಂ ಲೋ॒ಕಮಥೋ॑ ಅ॒ಮುಮ್ ।
ಕಾಮಾ॒ನ್ಥ್ಸಮ॑ರ್ಧಯನ್ತು ನಃ ।
ದೇ॒ವೀರ್ದೇ॒ವೈಃ ಸ॒ಮಾಭೃ॑ತಾಃ ।
ಪಾ॒ವ॒ಮಾ॒ನೀಃ ಸ್ವ॒ಸ್ತ್ಯಯ॑ನೀಃ ।
ಸು॒ದುಘಾ॒ ಹಿ ಘೃ॑ತ॒ಶ್ಚುತ॑: ।
ಋಷಿ॑ಭಿ॒: ಸಂಭೃ॑ತೋ॒ ರಸ॑: ॥ ೫

ಬ್ರಾ॒ಹ್ಮ॒ಣೇಷ್ವ॒ಮೃತಗ್ಂ॑ ಹಿ॒ತಮ್ । ಯೇನ॑ ದೇ॒ವಾಃ ಪ॒ವಿತ್ರೇ॑ಣ ।
ಆ॒ತ್ಮಾನಂ॑ ಪು॒ನತೇ॒ ಸದಾ᳚ ।
ತೇನ॑ ಸ॒ಹಸ್ರ॑ಧಾರೇಣ । ಪಾ॒ವ॒ಮಾ॒ನ್ಯಃ ಪು॑ನನ್ತು ಮಾ ।
ಪ್ರಾ॒ಜಾ॒ಪ॒ತ್ಯಂ ಪ॒ವಿತ್ರ᳚ಮ್ । ಶ॒ತೋದ್ಯಾ॑ಮಗ್ಂ ಹಿರ॒ಣ್ಮಯ᳚ಮ್ ।
ತೇನ॑ ಬ್ರಹ್ಮ॒ವಿದೋ॑ ವ॒ಯಮ್ । ಪೂ॒ತಂ ಬ್ರಹ್ಮ॑ ಪುನೀಮಹೇ ।
ಇನ್ದ್ರ॑: ಸುನೀ॒ತೀ ಸ॒ಹ ಮಾ॑ ಪುನಾತು । ಸೋಮ॑: ಸ್ವ॒ಸ್ತ್ಯಾ ವರು॑ಣಃ ಸ॒ಮೀಚ್ಯಾ᳚ ।
ಯ॒ಮೋ ರಾಜಾ᳚ ಪ್ರಮೃ॒ಣಾಭಿ॑: ಪುನಾತು ಮಾ । ಜಾ॒ತವೇ॑ದಾ ಮೋ॒ರ್ಜಯ॑ನ್ತ್ಯಾ ಪುನಾತು ॥ ೬

(ತೈ.ಆ.೧೦-೨೯-೪೭)
ಆಪೋ॒ ವಾ ಇ॒ದಗ್ಂ ಸರ್ವಂ॒ ವಿಶ್ವಾ॑ ಭೂ॒ತಾನ್ಯಾಪ॑: ಪ್ರಾ॒ಣಾ ವಾ ಆಪ॑: ಪ॒ಶವ॒ ಆಪೋಽನ್ನ॒ಮಾಪೋಽಮೃ॑ತ॒ಮಾಪ॑: ಸ॒ಮ್ರಾಡಾಪೋ॑ ವಿ॒ರಾಡಾಪ॑: ಸ್ವ॒ರಾಡಾಪ॒ಶ್ಛನ್ದಾ॒ಗ್॒ಸ್ಯಾಪೋ॒ ಜ್ಯೋತೀ॒ಗ್॒ಷ್ಯಾಪೋ॒ ಯಜೂ॒ಗ್॒ಷ್ಯಾಪ॑: ಸ॒ತ್ಯಮಾಪ॒: ಸರ್ವಾ॑ ದೇ॒ವತಾ॒ ಆಪೋ॒ ಭೂರ್ಭುವ॒: ಸುವ॒ರಾಪ॒ ಓಮ್ ॥

(ತೈ.ಬ್ರಾ.೩-೨-೪-೧)
ಅ॒ಪಃ ಪ್ರಣ॑ಯತಿ ।
ಶ್ರ॒ದ್ಧಾ ವಾ ಆಪ॑: ।
ಶ್ರ॒ದ್ಧಾಮೇ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ ।
ಅ॒ಪಃ ಪ್ರಣ॑ಯತಿ ।
ಯ॒ಜ್ಞೋ ವಾ ಆಪ॑: ।
ಯ॒ಜ್ಞಮೇ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ ।
ಅ॒ಪಃ ಪ್ರಣ॑ಯತಿ ।
ವಜ್ರೋ॒ ವಾ ಆಪ॑: ।
ವಜ್ರ॑ಮೇ॒ವ ಭ್ರಾತೃ॑ವ್ಯೇಭ್ಯಃ ಪ್ರಹೃತ್ಯ॑ ಪ್ರ॒ಣೀಯ॒ ಪ್ರಚ॑ರತಿ ।
ಅ॒ಪಃ ಪ್ರಣ॑ಯತಿ ।
ಆಪೋ॒ ವೈ ರ॑ಕ್ಷೋ॒ಘ್ನೀಃ ।
ರಕ್ಷ॑ಸಾ॒ಮಪ॑ಹತ್ಯೈ ।
ಅ॒ಪಃ ಪ್ರಣ॑ಯತಿ ।
ಆಪೋ॒ ವೈ ದೇ॒ವಾನಾಂ᳚ ಪ್ರಿ॒ಯಂ ಧಾಮ॑ ।
ದೇ॒ವಾನಾ॑ಮೇ॒ವ ಪ್ರಿ॒ಯಂ ಧಾಮ॑ ಪ್ರ॒ಣೀಯ॒ ಪ್ರಚ॑ರತಿ ।
ಅ॒ಪಃ ಪ್ರಣ॑ಯತಿ ।
ಆಪೋ॒ ವೈ ಸರ್ವಾ॑ ದೇ॒ವತಾ᳚: । ದೇ॒ವತಾ॑ ಏ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ ॥

ಶ್ರೀ ರುದ್ರಾಯ ನಮಃ । ಮಲಾಪಕರ್ಷಣಸ್ನಾನಂ ಸಮರ್ಪಯಾಮಿ ।

Did you see any mistake/variation in the content above? Click here to report mistakes and corrections in Stotranidhi content.