Read in తెలుగు / ಕನ್ನಡ / தமிழ் / देवनागरी / English (IAST)
|| సుగ్రీవలక్ష్మణానురోధః ||
ఇత్యుక్తస్తారయా వాక్యం ప్రశ్రితం ధర్మసంహితమ్ |
మృదుస్వభావః సౌమిత్రిః ప్రతిజగ్రాహ తద్వచః || ౧ ||
తస్మిన్ ప్రతిగృహీతే తు వాక్యే హరిగణేశ్వరః |
లక్ష్మణాత్సుమహత్త్రాసం వస్త్రం క్లిన్నమివాత్యజత్ || ౨ ||
తతః కంఠగతం మాల్యం చిత్రం బహుగుణం మహత్ |
చిచ్ఛేద విమదశ్చాసీత్ సుగ్రీవో వానరేశ్వరః || ౩ ||
స లక్ష్మణం భీమబలం సర్వవానరసత్తమః |
అబ్రవీత్ప్రశ్రితం వాక్యం సుగ్రీవః సంప్రహర్షయన్ || ౪ ||
ప్రనష్టా శ్రీశ్చ కీర్తిశ్చ కపిరాజ్యం చ శాశ్వతమ్ |
రామప్రసాదాత్ సౌమిత్రే పునః ప్రాప్తమిదం మయా || ౫ ||
కః శక్తస్తస్య దేవస్య విఖ్యాతస్య స్వకర్మణా |
తాదృశం విక్రమం వీర ప్రతికర్తుమరిందమ || ౬ ||
సీతాం ప్రప్స్యతి ధర్మాత్మా వధిష్యతి చ రావణమ్ |
సహాయమాత్రేణ మయా రాఘవః స్వేన తేజసా || ౭ ||
సహాయకృత్యం కిం తస్య యేన సప్త మహాద్రుమాః |
శైలశ్చ వసుధా చైవ బాణేనైకేన దారితాః || ౮ ||
ధనుర్విస్ఫారయాణస్య యస్య శబ్దేన లక్ష్మణ |
సశైలా కంపితా భూమిః సహాయైస్తస్య కిం ను వై || ౯ ||
అనుయాత్రాం నరేంద్రస్య కరిష్యేఽహం నరర్షభ |
గచ్ఛతో రావణం హంతుం వైరిణం సపురఃసరమ్ || ౧౦ ||
యది కించిదతిక్రాంతం విశ్వాసాత్ ప్రణయేన వా |
ప్రేష్యస్య క్షమితవ్యం మే న కశ్చిన్నాపరాధ్యతి || ౧౧ ||
ఇతి తస్య బ్రువాణస్య సుగ్రీవస్య మహాత్మనః |
అభవల్లక్ష్మణః ప్రీతః ప్రేమ్ణా చైనమువాచ హ || ౧౨ ||
సర్వథా హి మమ భ్రాతా సనాథో వానరేశ్వర |
త్వయా నాథేన సుగ్రీవ ప్రశ్రితేన విశేషతః || ౧౩ ||
యస్తే ప్రభావః సుగ్రీవ యచ్చ తే శౌచమార్జవమ్ |
అర్హస్త్వం కపిరాజ్యస్య శ్రియం భోక్తుమనుత్తమామ్ || ౧౪ ||
సహాయేన చ సుగ్రీవ త్వయా రామః ప్రతాపవాన్ |
వధిష్యతి రణే శత్రూనచిరాన్నాత్ర సంశయః || ౧౫ ||
ధర్మజ్ఞస్య కృతజ్ఞస్య సంగ్రామేష్వనివర్తినః |
ఉపపన్నం చ యుక్తం చ సుగ్రీవ తవ భాషితమ్ || ౧౬ ||
దోషజ్ఞః సతి సామర్థ్యే కోఽన్యో భాషితుమర్హతి |
వర్జయిత్వా మమ జ్యేష్ఠం త్వాం చ వానరసత్తమ || ౧౭ ||
సదృశశ్చాసి రామస్య విక్రమేణ బలేన చ |
సహాయో దైవతైర్దత్తశ్చిరాయ హరిపుంగవ || ౧౮ ||
కిం తు శీఘ్రమితో వీర నిష్క్రామ త్వం మయా సహ |
సాంత్వయస్వ వయస్యం త్వం భార్యాహరణకర్శితమ్ || ౧౯ ||
యచ్చ శోకాభిభూతస్య శ్రుత్వా రామస్య భాషితమ్ |
మయా త్వం పరుషాణ్యుక్తస్తచ్చ త్వం క్షంతుమర్హసి || ౨౦ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే షట్త్రింశః సర్గః || ౩౬ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.