Kishkindha Kanda Sarga 55 – கிஷ்கிந்தா⁴காண்ட³ பஞ்சபஞ்சாஶ꞉ ஸர்க³꞉ (55)

Read in తెలుగు / ಕನ್ನಡ / தமிழ் / देवनागरी / English (IAST)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ பஞ்சபஞ்சாஶ꞉ ஸர்க³꞉ (55)

॥ ப்ராயோபவேஶ꞉ ॥

ஶ்ருத்வா ஹநுமதோ வாக்யம் ப்ரஶ்ரிதம் த⁴ர்மஸம்ஹிதம் ।
ஸ்வாமிஸத்காரஸம்யுக்தமங்க³தோ³ வாக்யமப்³ரவீத் ॥ 1 ॥

ஸ்தை²ர்யமாத்ம மந꞉ஶௌசமாந்ருஶம்ஸ்யமதா²ர்ஜவம் ।
விக்ரமஶ்சைவ தை⁴ர்யம் ச ஸுக்³ரீவே நோபபத்³யதே ॥ 2 ॥

ப்⁴ராதுர்ஜ்யேஷ்ட²ஸ்ய யோ பா⁴ர்யாம் ஜீவிதோ மஹிஷீம் ப்ரியாம் ।
த⁴ர்மேண மாதரம் யஸ்து ஸ்வீகரோதி ஜுகு³ப்ஸித꞉ ॥ 3 ॥

கத²ம் ஸ த⁴ர்மம் ஜாநீதே யேந ப்⁴ராத்ரா மஹாத்மநா ।
யுத்³தா⁴யாபி⁴நியுக்தேந பி³லஸ்ய பிஹிதம் முக²ம் ॥ 4 ॥

ஸத்யாத்பாணிக்³ருஹீதஶ்ச க்ருதகர்மா மஹாயஶா꞉ ।
விஸ்ம்ருதோ ராக⁴வோ யேந ஸ கஸ்ய து க்ருதம் ஸ்மரேத் ॥ 5 ॥

லக்ஷ்மணஸ்ய ப⁴யாத்³யேந நாத⁴ர்மப⁴யபீ⁴ருணா ।
ஆதி³ஷ்டா மார்கி³தும் ஸீதாம் த⁴ர்மமஸ்மிந் கத²ம் ப⁴வேத் ॥ 6 ॥

தஸ்மிந் பாபே க்ருதக்⁴நே து ஸ்ம்ருதிஹீநே சலாத்மநி ।
ஆர்ய꞉ கோ விஶ்வஸேஜ்ஜாது தத்குலீநோ ஜிஜீவிஷு꞉ ॥ 7 ॥

ராஜ்யே புத்ர꞉ ப்ரதிஷ்டா²ப்ய꞉ ஸகு³ணோ நிர்கு³ணோ(அ)பி வா ।
கத²ம் ஶத்ருகுலீநம் மாம் ஸுக்³ரீவோ ஜீவயிஷ்யதி ॥ 8 ॥

பி⁴ந்நமந்த்ரோ(அ)பராத்³த⁴ஶ்ச ஹீநஶக்தி꞉ கத²ம் ஹ்யஹம் ।
கிஷ்கிந்தா⁴ம் ப்ராப்ய ஜீவேயமநாத² இவ து³ர்ப³ல꞉ ॥ 9 ॥

உபாம்ஶுத³ண்டே³ந ஹி மாம் ப³ந்த⁴நேநோபபாத³யேத் ।
ஶட²꞉ க்ரூரோ ந்ருஶம்ஸஶ்ச ஸுக்³ரீவோ ராஜ்யகாரணாத் ॥ 10 ॥

ப³ந்த⁴நாத்³வா(அ)வஸாதா³ந்மே ஶ்ரேய꞉ ப்ராயோபவேஶநம் ।
அநுஜாநீத மாம் ஸர்வே க்³ருஹம் க³ச்ச²ந்து வாநரா꞉ ॥ 11 ॥

அஹம் வ꞉ ப்ரதிஜாநாமி நாக³மிஷ்யாம்யஹம் புரீம் ।
இஹைவ ப்ராயமாஸிஷ்யே ஶ்ரேயோ மரணமேவ மே ॥ 12 ॥

அபி⁴வாத³நபூர்வம் து ராக⁴வௌ ப³லஶாலிநௌ ।
அபி⁴வாத³நபூர்வம் து ராஜா குஶலமேவ ச ॥ 13 ॥

வாச்யஸ்தாதோ யவீயாந் மே ஸுக்³ரீவோ வாநரேஶ்வர꞉ ।
ஆரோக்³யபூர்வம் குஶலம் வாச்யா மாதா ருமா ச மே ॥ 14 ॥

மாதரம் சைவ மே தாராமாஶ்வாஸயிதுமர்ஹத² ।
ப்ரக்ருத்யா ப்ரியபுத்ரா ஸா ஸாநுக்ரோஶா தபஸ்விநீ ॥ 15 ॥

விநஷ்டமிஹ மாம் ஶ்ருத்வா வ்யக்தம் ஹாஸ்யதி ஜீவிதம் ।
ஏதாவது³க்த்வா வசநம் வ்ருத்³தா⁴ம்ஸ்தாநபி⁴வாத்³ய ச ॥ 16 ॥

விவேஶ சாங்க³தோ³ பூ⁴மௌ ருத³ந் த³ர்பே⁴ஷு து³ர்மநா꞉ ।
தஸ்ய ஸம்விஶதஸ்தத்ர ருத³ந்தோ வாநரர்ஷபா⁴꞉ ॥ 17 ॥

நயநேப்⁴ய꞉ ப்ரமுமுசுருஷ்ணம் வை வாரி து³꞉கி²தா꞉ ।
ஸுக்³ரீவம் சைவ நிந்த³ந்த꞉ ப்ரஶம்ஸந்தஶ்ச வாலிநம் ॥ 18 ॥

பரிவார்யாங்க³த³ம் ஸர்வே வ்யவஸந் ப்ராயமாஸிதும் ।
மதம் தத்³வாலிபுத்ரஸ்ய விஜ்ஞாய ப்லவக³ர்ஷபா⁴꞉ ॥ 19 ॥

உபஸ்ப்ருஶ்யோத³கம் தத்ர ப்ராங்முகா²꞉ ஸமுபாவிஶந் ।
த³க்ஷிணாக்³ரேஷு த³ர்பே⁴ஷு உத³க்தீரம் ஸமாஶ்ரிதா꞉ ॥ 20 ॥

முமூர்ஷவோ ஹரிஶ்ரேஷ்டா² ஏதத்க்ஷமமிதி ஸ்ம ஹ ।
ராமஸ்ய வநவாஸம் ச க்ஷயம் த³ஶரத²ஸ்ய ச ॥ 21 ॥

ஜநஸ்தா²நவத⁴ம் சைவ வத⁴ம் சைவ ஜடாயுஷ꞉ ।
ஹரணம் சைவ வைதே³ஹ்யா வாலிநஶ்ச வத⁴ம் ரணே ।
ராமகோபம் ச வத³தாம் ஹரீணாம் ப⁴யமாக³தம் ॥ 22 ॥

ஏவம் வத³த்³பி⁴ர்ப³ஹுபி⁴ர்மஹீத⁴ரோ
மஹாத்³ரிகூடப்ரதிமை꞉ ப்லவங்க³மை꞉ ।
ப³பூ⁴வ ஸந்நாதி³தநிர்த³ராந்தரோ
ப்⁴ருஶம் நத³த்³பி⁴ர்ஜலதை³ரிவோல்ப³ணை꞉ ॥ 23 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ பஞ்சபஞ்சாஶ꞉ ஸர்க³꞉ ॥ 55 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.