Aranya Kanda Sarga 52 – அரண்யகாண்ட³ த்³விபஞ்சாஶ꞉ ஸர்க³꞉ (52)

Read in తెలుగు / ಕನ್ನಡ / தமிழ் / देवनागरी / English (IAST)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ த்³விபஞ்சாஶ꞉ ஸர்க³꞉ (52)

॥ ஸீதாவிக்ரோஶ꞉ ॥

தமல்பஜீவிதம் க்³ருத்⁴ரம் ஸ்பு²ரந்தம் ராக்ஷஸாதி⁴ப꞉ ।
த³த³ர்ஶ பூ⁴மௌ பதிதம் ஸமீபே ராக⁴வாஶ்ரமாத் ॥ 1 ॥

ஸா து தாராதி⁴பமுகீ² ராவணேந ஸமீக்ஷ்ய தம் ।
க்³ருத்⁴ரராஜம் விநிஹதம் விளலாப ஸுது³꞉கி²தா ॥ 2 ॥

ஆலிங்க்³ய க்³ருத்⁴ரம் நிஹதம் ராவணேந ப³லீயஸா ।
விளலாப ஸுது³꞉கா²ர்தா ஸீதா ஶஶிநிபா⁴நநா ॥ 3 ॥

நிமித்தம் லக்ஷணஜ்ஞாநம் ஶகுநிஸ்வரத³ர்ஶநம் ।
அவஶ்யம் ஸுக²து³꞉கே²ஷு நராணாம் ப்ரதித்³ருஶ்யதே ॥ 4 ॥

நூநம் ராம ந ஜாநாஸி மஹத்³வ்யஸநமாத்மந꞉ ।
தா⁴வந்தி நூநம் காகுத்ஸ்த²ம் மத³ர்த²ம் ம்ருக³பக்ஷிண꞉ ॥ 5 ॥

அயம் ஹி பாபசாரேண மாம் த்ராதுமபி⁴ஸங்க³த꞉ ।
ஶேதே விநிஹதோ பூ⁴மௌ மமாபா⁴க்³யாத்³விஹங்க³ம꞉ ॥ 6 ॥

த்ராஹி மாமத்³ய காகுத்ஸ்த² லக்ஷ்மணேதி வராங்க³நா ।
ஸுஸந்த்ரஸ்தா ஸமாக்ரந்த³ச்ச்²ருண்வதாம் து யதா²ந்திகே ॥ 7 ॥

தாம் க்லிஷ்டமால்யாப⁴ரணாம் விளபந்தீமநாத²வத் ।
அப்⁴யதா⁴வத வைதே³ஹீம் ராவணோ ராக்ஷஸாதி⁴ப꞉ ॥ 8 ॥

தாம் லதாமிவ வேஷ்டந்தீமாலிங்க³ந்தீம் மஹாத்³ருமாந் ।
முஞ்ச முஞ்சேதி ப³ஹுஶ꞉ ப்ரவத³ந் ராக்ஷஸாதி⁴ப꞉ ॥ 9 ॥

க்ரோஶந்தீம் ராம ராமேதி ராமேண ரஹிதாம் வநே ।
ஜீவிதாந்தாய கேஶேஷு ஜக்³ராஹாந்தகஸந்நிப⁴꞉ ॥ 10 ॥

ப்ரத⁴ர்ஷிதாயாம் ஸீதாயாம் ப³பூ⁴வ ஸசராசரம் ।
ஜக³த்ஸர்வமமர்யாத³ம் தமஸா(அ)ந்தே⁴ந ஸம்வ்ருதம் ॥ 11 ॥

ந வாதி மாருதஸ்தத்ர நிஷ்ப்ரபோ⁴(அ)பூ⁴த்³தி³வாகர꞉ ।
த்³ருஷ்ட்வா ஸீதாம் பராம்ருஷ்டாம் தீ³நாம் தி³வ்யேந சக்ஷுஷா ॥ 12 ॥

க்ருதம் கார்யமிதி ஶ்ரீமாந் வ்யாஜஹார பிதாமஹ꞉ ।
ப்ரஹ்ருஷ்டா வ்யதி²தாஶ்சாஸந் ஸர்வே தே பரமர்ஷய꞉ ॥ 13 ॥

த்³ருஷ்ட்வா ஸீதாம் பராம்ருஷ்டாம் த³ண்ட³காரண்யவாஸிந꞉ ।
ராவணஸ்ய விநாஶம் ச ப்ராப்தம் பு³த்⁴வா யத்³ருச்ச²யா ॥ 14 ॥

ஸ து தாம் ராமராமேதி ருத³ந்தீம் லக்ஷ்மணேதி ச ।
ஜகா³மாதா³ய சாகாஶம் ராவணோ ராக்ஷஸேஶ்வர꞉ ॥ 15 ॥

தப்தாப⁴ரணவர்ணாங்கீ³ பீதகௌஶேயவாஸிநீ ।
ரராஜ ராஜபுத்ரீ து வித்³யுத்ஸௌதா³மிநீ யதா² ॥ 16 ॥

உத்³தூ⁴தேந ச வஸ்த்ரேண தஸ்யா꞉ பீதேந ராவண꞉ ।
அதி⁴கம் ப்ரதிப³ப்⁴ராஜ கி³ரிர்தீ³ப்த இவாக்³நிநா ॥ 17 ॥

தஸ்யா꞉ பரமகல்யாண்யாஸ்தாம்ராணி ஸுரபீ⁴ணி ச ।
பத்³மபத்ராணி வைதே³ஹ்யா அப்⁴யகீர்யந்த ராவணம் ॥ 18 ॥

தஸ்யா꞉ கௌஶேயமுத்³தூ⁴தமாகாஶே கநகப்ரப⁴ம் ।
ப³பௌ⁴ சாதி³த்யராகே³ண தாம்ரமப்⁴ரமிவாதபே ॥ 19 ॥

தஸ்யாஸ்தத்ஸுநஸம் வக்த்ரமாகாஶே ராவணாங்கக³ம் ।
ந ரராஜ விநா ராமம் விநாலமிவ பங்கஜம் ॥ 20 ॥

ப³பூ⁴வ ஜலத³ம் நீலம் பி⁴த்த்வா சந்த்³ர இவோதி³த꞉ ।
ஸுலலாடம் ஸுகேஶாந்தம் பத்³மக³ர்பா⁴ப⁴மவ்ரணம் ॥ 21 ॥

ஶுக்லை꞉ ஸுவிமலைர்த³ந்தை꞉ ப்ரபா⁴வத்³பி⁴ரளங்க்ருதம் ।
தஸ்யாஸ்தத்³விமலம் வக்த்ரமாகாஶே ராவணாங்கக³ம் ॥ 22 ॥

ருதி³தம் வ்யபம்ருஷ்டாஸ்ரம் சந்த்³ரவத்ப்ரியத³ர்ஶநம் ।
ஸுநாஸம் சாருதாம்ரோஷ்ட²மாகாஶே ஹாடகப்ரப⁴ம் ॥ 23 ॥

ராக்ஷஸேந ஸமாதூ⁴தம் தஸ்யாஸ்தத்³வத³நம் ஶுப⁴ம் ।
ஶுஶுபே⁴ ந விநா ராமம் தி³வா சந்த்³ர இவோதி³த꞉ ॥ 24 ॥

ஸா ஹேமவர்ணா நீலாங்க³ம் மைதி²லீ ராக்ஷஸாதி⁴பம் ।
ஶுஶுபே⁴ காஞ்சநீ காஞ்சீ நீலம் மணிமிவாஶ்ரிதா ॥ 25 ॥

ஸா பத்³மகௌ³ரீ ஹேமாபா⁴ ராவணம் ஜநகாத்மஜா ।
வித்³யுத்³க⁴நமிவாவிஶ்ய ஶுஶுபே⁴ தப்தபூ⁴ஷணா ॥ 26 ॥

தருப்ரவாளரக்தா ஸா நீலாங்க³ம் ராக்ஷஸேஶ்வரம் ।
ப்ராஶோப⁴யத வைதே³ஹீ க³ஜம் கக்ஷ்யேவ காஞ்சநீ ॥ 27 ॥

தஸ்யா பூ⁴ஷணகோ⁴ஷேண வைதே³ஹ்யா ராக்ஷஸாதி⁴ப꞉ ।
ப³பௌ⁴ ஸசபலோ நீல꞉ ஸகோ⁴ஷ இவ தோயத³꞉ ॥ 28 ॥

உத்தமாங்கா³ச்ச்யுதா தஸ்யா꞉ புஷ்பவ்ருஷ்டி꞉ ஸமந்தத꞉ ।
ஸீதாயா ஹ்ரியமாணாயா꞉ பபாத த⁴ரணீதலே ॥ 29 ॥

ஸா து ராவணவேகே³ந புஷ்பவ்ருஷ்டி꞉ ஸமந்தத꞉ ।
ஸமாதூ⁴தா த³ஶக்³ரீவம் புநரேவாப்⁴யவர்தத ॥ 30 ॥

அப்⁴யவர்தத புஷ்பாணாம் தா⁴ரா வைஶ்ரவணாநுஜம் ।
நக்ஷத்ரமாலா விமலா மேரும் நக³மிவோந்நதம் ॥ 31 ॥

சரணாந்நூபுரம் ப்⁴ரஷ்டம் வைதே³ஹ்யா ரத்நபூ⁴ஷிதம் ।
வித்³யுந்மண்ட³லஸங்காஶம் பபாத மது⁴ரஸ்வநம் ॥ 32 ॥

தாம் மஹோல்காமிவாகாஶே தீ³ப்யமாநாம் ஸ்வதேஜஸா ।
ஜஹாராகாஶமாவிஶ்ய ஸீதாம் வைஶ்ரவணாநுஜ꞉ ॥ 33 ॥

தஸ்யாஸ்தாந்யக்³நிவர்ணாநி பூ⁴ஷணாநி மஹீதலே ।
ஸகோ⁴ஷாண்யவகீர்யந்த க்ஷீணாஸ்தாரா இவாம்ப³ராத் ॥ 34 ॥

தஸ்யா꞉ ஸ்தநாந்தராத்³ப்⁴ரஷ்டோ ஹாரஸ்தாராதி⁴பத்³யுதி꞉ ।
வைதே³ஹ்யா நிபதந் பா⁴தி க³ங்கே³வ க³க³நாச்ச்யுதா ॥ 35 ॥

உத்பந்நவாதாபி⁴ஹதா நாநாத்³விஜக³ணாயுதா꞉ ।
மா பை⁴ரிதி விதூ⁴தாக்³ரா வ்யாஜஹ்நுரிவ பாத³பா꞉ ॥ 36 ॥ [-ஜஹ்ர]

ளிந்யோ த்⁴வஸ்தகமலாஸ்த்ரஸ்தமீநஜலேசரா꞉ ।
ஸகீ²மிவ க³தோச்ச்²வாஸாமந்வஶோசந்த மைதி²லீம் ॥ 37 ॥

ஸமந்தாத³பி⁴ஸம்பத்ய ஸிம்ஹவ்யாக்⁴ரம்ருக³த்³விஜா꞉ ।
அந்வதா⁴வம்ஸ்ததா³ ரோஷாத் ஸீதாம் சா²யாநுகா³மிந꞉ ॥ 38 ॥

ஜலப்ரபாதாஸ்ரமுகா²꞉ ஶ்ருங்கை³ருச்ச்²ரிதபா³ஹவ꞉ ।
ஸீதாயாம் ஹ்ரியமாணாயாம் விக்ரோஶந்தீவ பர்வதா꞉ ॥ 39 ॥

ஹ்ரியமாணாம் து வைதே³ஹீம் த்³ருஷ்ட்வா தீ³நோ தி³வாகர꞉ ।
ப்ரதித்⁴வஸ்தப்ரப⁴꞉ ஶ்ரீமாநாஸீத் பாண்ட³ரமண்ட³ல꞉ ॥ 40 ॥

நாஸ்தி த⁴ர்ம꞉ குத꞉ ஸத்யம் நார்ஜவம் நாந்ருஶம்ஸதா ।
யத்ர ராமஸ்ய வைதே³ஹீம் பா⁴ர்யாம் ஹரதி ராவண꞉ ॥ 41 ॥

இதி ஸர்வாணி பூ⁴தாநி க³ணஶ꞉ பர்யதே³வயந் ।
வித்ரஸ்தகா தீ³நமுகா² ருருது³ர்ம்ருக³போதகா꞉ ॥ 42 ॥

உத்³வீக்ஷ்யோத்³வீக்ஷ்ய நயநைராஸ்ரபாதாவிளேக்ஷணா꞉ ।
ஸுப்ரவேபிதகா³த்ராஶ்ச ப³பூ⁴வுர்வநதே³வதா꞉ ॥ 43 ॥

விக்ரோஶந்தீம் த்³ருட⁴ம் ஸீதாம் த்³ருஷ்ட்வா து³꞉க²ம் ததா² க³தாம் ।
தாம் து லக்ஷ்மண ராமேதி க்ரோஶந்தீம் மது⁴ரஸ்வரம் ॥ 44 ॥

அவேக்ஷமாணாம் ப³ஹுஶோ வைதே³ஹீம் த⁴ரணீதலம் ।
ஸ தாமாகுலகேஶாந்தாம் விப்ரம்ருஷ்டவிஶேஷகாம் ।
ஜஹாராத்மவிநாஶாய த³ஶக்³ரீவோ மநஸ்விநீம் ॥ 45 ॥

ததஸ்து ஸா சாருத³தீ ஶுசிஸ்மிதா
விநாக்ருதா ப³ந்து⁴ஜநேந மைதி²லீ ।
அபஶ்யதீ ராக⁴வலக்ஷ்மணாவுபௌ⁴
விவர்ணவக்த்ரா ப⁴யபா⁴ரபீடி³தா ॥ 46 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ த்³விபஞ்சாஶ꞉ ஸர்க³꞉ ॥ 52 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.