Read in తెలుగు / ಕನ್ನಡ / தமிழ் / देवनागरी / English (IAST)
రాజోవాచ |
వాక్పుష్పేణ కథం బ్రహ్మన్ బ్రహ్మాప్యర్చితవాన్ హరిమ్ |
తన్మే కథయ విప్రేంద్ర బ్రహ్మోక్తం స్తోత్రముత్తమమ్ || ౧ ||
మార్కండేయ ఉవాచ |
శృణు రాజన్ ప్రవక్ష్యామి స్తోత్రం బ్రహ్మముఖేరితమ్ |
సర్వపాపహరం పుణ్యం విష్ణుతుష్టికరం పరమ్ || ౨ ||
తమారాధ్య జగన్నాథమూర్ధ్వబాహుః పితామహః |
భూత్వైకాగ్రమనా రాజన్నిదం స్తోత్రముదీరయత్ || ౩ ||
బ్రహ్మోవాచ |
నమామి దేవం నరనాథమచ్యుతం
నారాయణం లోకగురుం సనాతనమ్ |
అనాదిమవ్యక్తమచింత్యమవ్యయం
వేదాంతవేద్యం పురుషోత్తమం హరిమ్ || ౪ ||
ఆనందరూపం పరమం పరాత్పరం
చిదాత్మకం జ్ఞానవతాం పరాం గతిమ్ |
సర్వాత్మకం సర్వగతైకరూపం
ధ్యేయస్వరూపం ప్రణమామి మాధవమ్ || ౫ ||
భక్తప్రియం కాంతమతీవ నిర్మలం
సురాధిపం సూరిజనైరభిష్టుతమ్ |
చతుర్భుజం నీరజవర్ణమీశ్వరం
రథాంగపాణిం ప్రణతోఽస్మి కేశవమ్ || ౬ ||
గదాసిశంఖాబ్జకరం శ్రియః పతిం
సదాశివం శార్ఙ్గధరం రవిప్రభమ్ |
పీతాంబరం హారవిరాజితోదరం
నమామి విష్ణుం సతతం కిరీటినమ్ || ౭ ||
గండస్థలాసక్తసురక్తకుండలం
సుదీపితాశేషదిశం నిజత్విషా |
గంధర్వసిద్ధైరుపగీతమృగ్ధ్వనిం
జనార్దనం భూతపతిం నమామి తమ్ || ౮ ||
హత్వాసురాన్ పాతి యుగే యుగే సురాన్
స్వధర్మసంస్థాన్ భువి సంస్థితో హరిః |
కరోతి సృష్టిం జగతః క్షయం య-
-స్తం వాసుదేవం ప్రణతోఽస్మి కేశవమ్ || ౯ ||
యో మత్స్యరూపేణ రసాతలస్థితాన్
వేదాన్ సమాహృత్య మమ ప్రదత్తవాన్ |
నిహత్య యుద్ధే మధుకైటభావుభౌ
తం వేదవేద్యం ప్రణతోఽస్మ్యహం సదా || ౧౦ ||
దేవాసురైః క్షీరసముద్రమధ్యతో
న్యస్తో గిరిర్యేన ధృతః పురా మహాన్ |
హితాయ కౌర్మం వపురాస్థితో య-
-స్తం విష్ణుమాద్యం ప్రణతోఽస్మి భాస్కరమ్ || ౧౧ ||
హత్వా హిరణ్యాక్షమతీవ దర్పితం
వరాహరూపీ భగవాన్ సనాతనః |
యో భూమిమేతాం సకలాం సముద్ధర-
-స్తం వేదమూర్తిం ప్రణమామి సూకరమ్ || ౧౨ ||
కృత్వా నృసింహం వపురాత్మనః పరం
హితాయ లోకస్య సనాతనో హరిః
జఘాన యస్తీక్ష్ణనఖైర్దితేః సుతం
తం నారసింహం పురుషం నమామి || ౧౩ ||
యో వామనోఽసౌ భగవాన్ జనార్దనో
బలిం బబంధ త్రిభిరూర్జితైః పదైః |
జగత్రయం క్రమ్య దదౌ పురందరే
తదేవమాద్యం ప్రణతోఽస్మి వామనమ్ || ౧౪ ||
యః కార్తవీర్యం నిజఘాన రోషాత్
త్రిఃసప్తకృత్వః క్షితిపాత్మజానపి |
తం జామదగ్న్యం క్షితిభారనాశకం
నతోఽస్మి విష్ణుం పురుషోత్తమం సదా || ౧౫ ||
సేతుం మహాంతం జలధౌ బబంధ యః
సంప్రాప్య లంకాం సగణం దశాననమ్ |
జఘాన భృత్యై జగతాం సనాతనం
తం రామదేవం సతతం నతోఽస్మి || ౧౬ ||
యథా తు వారాహనృసింహరూపైః
కృతం త్వయా దేవ హితం సురాణామ్ |
తథాద్య భూమేః కురు భారహానిం
ప్రసీద విష్ణో భగవన్నమస్తే || ౧౭ ||
శ్రీమార్కండేయ ఉవాచ |
ఇతి స్తుతో జగన్నాథః శ్రీధరః పద్మయోనినా |
ఆవిర్బభూవ భగవాన్ శంఖచక్రగదాధరః || ౧౮ ||
ఉవాచ చ హృషీకేశః పద్మయోనిం సురానపి |
స్తుత్యానయాహం సంతుష్టః పితామహ దివౌకసః |
పఠతాం పాపనాశాయ నౄణాం భక్తిమతామపి || ౧౯ ||
ఇతి శ్రీనరసింహపురాణే త్రిపంచాశోఽధ్యాయే బ్రహ్మ కృత శ్రీ విష్ణు స్తోత్రమ్ ||
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.