Read in తెలుగు / ಕನ್ನಡ / தமிழ் / English (IAST)
పఞ్చత్రింశదశకమ్ (౩౫) – శ్రీరామావతారమ్-౨
నీతస్సుగ్రీవమైత్రీం తదను హనుమతా దున్దుభేః కాయముచ్చైః
క్షిప్త్వాఙ్గుష్ఠేన భూయో లులువిథ యుగపత్పత్రిణా సప్త సాలాన్ |
హత్వా సుగ్రీవఘాతోద్యతమతులబలం వాలినం వ్యాజవృత్త్యా
వర్షావేలామనైషీర్విరహతరలితస్త్వం మతఙ్గాశ్రమాన్తే || ౩౫-౧ ||
సుగ్రీవేణానుజోక్త్యా సభయమభియతా వ్యూహితాం వాహినీం తా-
మృక్షాణాం వీక్ష్య దిక్షు ద్రుతమథ దయితామార్గణాయావనమ్రామ్ |
సన్దేశం చాఙ్గులీయం పవనసుతకరే ప్రాదిశో మోదశాలీ
మార్గే మార్గే మమార్గే కపిభిరపి తదా త్వత్ప్రియా సప్రయాసైః || ౩౫-౨ ||
త్వద్వార్తాకర్ణనోద్యద్గరుదురుజవసమ్పాతిసమ్పాతివాక్య-
ప్రోత్తీర్ణార్ణోధిరన్తర్నగరి జనకజాం వీక్ష్య దత్త్వాఽఙ్గులీయమ్ |
ప్రక్షుద్యోద్యానమక్షక్షపణచణరణః సోఢబన్ధో దశాస్యం
దృష్ట్వా ప్లుష్ట్వా చ లఙ్కాం ఝటితి స హనుమాన్మౌలిరత్నం దదౌ తే || ౩౫-౩ ||
త్వం సుగ్రీవాఙ్గదాదిప్రబలకపిచమూచక్రవిక్రాన్తభూమీ-
చక్రోఽభిక్రమ్య పారేజలధి నిశిచరేన్ద్రానుజాశ్రీయమాణః |
తత్ప్రోక్తాం శత్రువార్తాం రహసి నిశమయన్ప్రార్థనాపార్థ్యరోష-
ప్రాస్తాగ్నేయాస్త్రతేజస్త్రసదుదధిగిరా లబ్ధవాన్మధ్యమార్గమ్ || ౩౫-౪ ||
కీశైరాశాన్తరోపాహృతగిరినికరైః సేతుమాధాప్య యాతో
యాతూన్యామర్ద్య దంష్ట్రానఖశిఖరిశిలాసాలశస్త్రైః స్వసైన్యైః |
వ్యాకుర్వన్సానుజస్త్వం సమరభువి పరం విక్రమం శక్రజేత్రా
వేగాన్నాగాస్త్రబద్ధః పతగపతిగరున్మారుతైర్మోచితోఽభూః || ౩౫-౫ ||
సౌమిత్రిస్త్వత్ర శక్తిప్రహృతిగలదసుర్వాతజానీతశైల-
ఘ్రాణాత్ప్రాణానుపేతో వ్యకృణుత కుసృతిశ్లాఘినం మేఘనాదమ్ |
మాయాక్షోభేషు వైభీషణవచనహృతస్తంభనః కుంభకర్ణం
సమ్ప్రాప్తం కమ్పితోర్వీతలమఖిలచమూభక్షిణం వ్యక్షిణోస్త్వమ్ || ౩౪-౬ ||
గృహ్ణన్ జంభారిసమ్ప్రేషితరథకవచౌ రావణేనాభియుధ్యన్
బ్రహ్మాస్త్రేణాస్య భిన్దన్ గలతతిమబలామగ్నిశుద్ధాం ప్రగృహ్ణన్ |
దేవశ్రేణీవరోజ్జీవితసమరమృతైరక్షతైః రృక్షసఙ్ఘై-
ర్లఙ్కాభర్త్రా చ సాకం నిజనగరమగాః సప్రియః పుష్పకేణ || ౩౫-౭ ||
ప్రీతో దివ్యాభిషేకైరయుతసమధికాన్వత్సరాన్పర్యరంసీ-
ర్మైథిల్యాం పాపవాచా శివ శివ కిల తాం గర్భిణీమభ్యహాసీః |
శత్రుఘ్నేనార్దయిత్వా లవణనిశిచరం ప్రార్దయః శూద్రపాశం
తావద్వాల్మీకిగేహే కృతవసతిరుపాసూత సీతా సుతౌ తే || ౩౫-౮ ||
వాల్మీకేస్త్వత్సుతోద్గాపితమధురకృతేరాజ్ఞయా యజ్ఞవాటే
సీతాం త్వయ్యాప్తుకామే క్షితిమవిశదసౌ త్వం చ కాలార్థితోఽభూః |
హేతోః సౌమిత్రిఘాతీ స్వయమథ సరయూమగ్ననిశ్శేషభృత్యైః
సాకం నాకం ప్రయాతో నిజపదమగమో దేవ వైకుణ్ఠమాద్యమ్ || ౩౫-౯ ||
సోఽయం మర్త్యావతారస్తవ ఖలు నియతం మర్త్యశిక్షార్థమేవం
విశ్లేషార్తిర్నిరాగస్త్యజనమపి భవేత్కామధర్మాతిసక్త్యా |
నో చేత్స్వాత్మానుభూతేః క్వను తవ మనసో విక్రియా చక్రపాణే
స త్వం సత్త్వైకమూర్తే పవనపురపతే వ్యాధును వ్యాధితాపాన్ || ౩౫-౧౦ ||
ఇతి పఞ్చత్రింశదశకం సమాప్తమ్ |
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.