Read in తెలుగు / ಕನ್ನಡ / தமிழ் / देवनागरी / English (IAST)
|| హనూమన్మంత్రః ||
అంగదస్య వచః శ్రుత్వా సుగ్రీవః సచివైః సహ |
లక్ష్మణం కుపితం శ్రుత్వా ముమోచాసనమాత్మవాన్ || ౧ ||
సచివానబ్రవీద్వాక్యం నిశ్చిత్య గురులాఘవమ్ |
మంత్రజ్ఞాన్మంత్రకుశలో మంత్రేషు పరినిష్ఠితాన్ || ౨ ||
న మే దుర్వ్యాహృతం కించిన్నాపి మే దురనుష్ఠితమ్ |
లక్ష్మణో రాఘవభ్రాతా క్రుద్ధః కిమితి చింతయే || ౩ ||
అసుహృద్భిర్మమామిత్రైర్నిత్యమంతరదర్శిభిః |
మమ దోషానసంభూతాన్ శ్రావితో రాఘవానుజః || ౪ ||
అత్ర తావద్యథాబుద్ధి సర్వైరేవ యథావిధి |
భావస్య నిశ్చయస్తావద్విజ్ఞేయో నిపుణం శనైః || ౫ ||
న ఖల్వస్తి మమ త్రాసో లక్ష్మణాన్నాపి రాఘవాత్ |
మిత్రం త్వస్థానకుపితం జనయత్యేవ సంభ్రమమ్ || ౬ ||
సర్వథా సుకరం మిత్రం దుష్కరం పరిపాలనమ్ |
అనిత్యత్వాచ్చ చిత్తానాం ప్రీతిరల్పేఽపి భిద్యతే || ౭ ||
అతో నిమిత్తం త్రస్తోఽహం రామేణ తు మహాత్మనా |
యన్మమోపకృతం శక్యం ప్రతికర్తుం న తన్మయా || ౮ ||
సుగ్రీవేణైవముక్తస్తు హనుమాన్ మారుతాత్మజః |
ఉవాచ స్వేన తర్కేణ మధ్యే వానరమంత్రిణామ్ || ౯ ||
సర్వథా నైతదాశ్చర్యం యస్త్వం హరిగణేశ్వర |
న విస్మరసి సుస్నిగ్ధముపకారకృతం శుభమ్ || ౧౦ ||
రాఘవేణ తు వీరేణ భయముత్సృజ్య దూరతః |
త్వత్ప్రియార్థం హతో వాలీ శక్రతుల్యపరాక్రమః || ౧౧ ||
సర్వథా ప్రణయాత్ క్రుద్ధో రాఘవో నాత్ర సంశయః |
భ్రాతరం సంప్రహితవాన్ లక్ష్మణం లక్ష్మివర్ధనమ్ || ౧౨ ||
త్వం ప్రమత్తో న జానీషే కాలం కాలవిదాం వర |
ఫుల్లసప్తచ్ఛదశ్యామా ప్రవృత్తా తు శరచ్ఛివా || ౧౩ ||
నిర్మలగ్రహనక్షత్రా ద్యౌః ప్రనష్టబలాహకా |
ప్రసన్నాశ్చ దిశః సర్వాః సరితశ్చ సరాంసి చ || ౧౪ ||
ప్రాప్తముద్యోగకాలం తు నావైషి హరిపుంగవ |
త్వం ప్రమత్త ఇతి వ్యక్తం లక్ష్మణోఽయమిహాగతః || ౧౫ ||
ఆర్తస్య హృతదారస్య పరుషం పురుషాంతరాత్ |
వచనం మర్షణీయం తే రాఘవస్య మహాత్మనః || ౧౬ ||
కృతాపరాధస్య హి తే నాన్యత్ పశ్యామ్యహం క్షమమ్ |
అంతరేణాంజలిం బద్ధ్వా లక్ష్మణస్య ప్రసాదనాత్ || ౧౭ ||
నియుక్తైర్మంత్రిభిర్వాచ్యో హ్యవశ్యం పార్థివో హితమ్ |
అత ఏవ భయం త్యక్త్వా బ్రవీమ్యవధృతం వచః || ౧౮ ||
అభిక్రుద్ధః సమర్థో హి చాపముద్యమ్య రాఘవః |
సదేవాసురగంధర్వం వశే స్థాపయితుం జగత్ || ౧౯ ||
న స క్షమః కోపయితుం యః ప్రసాద్యః పునర్భవేత్ |
పూర్వోపకారం స్మరతా కృతజ్ఞేన విశేషతః || ౨౦ ||
తస్య మూర్ధ్నా ప్రణమ్య త్వం సపుత్రః ససుహృజ్జనః |
రాజంస్తిష్ఠ స్వసమయే భర్తుర్భార్యేవ తద్వశే || ౨౧ ||
న రామరామానుజశాసనం త్వయా
కపీంద్ర యుక్తం మనసాప్యపోహితుమ్ |
మనో హి తే జ్ఞాస్యతి మానుషం బలం
సరాఘవస్యాస్య సురేంద్రవర్చసః || ౨౨ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ద్వాత్రింశః సర్గః || ౩౨ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.