Read in తెలుగు / ಕನ್ನಡ / தமிழ் / देवनागरी / English (IAST)
ప్రణమ్య సాంబమీశానాం శిరసా వైణికో మునిః |
వినయాఽవనతో భూత్వా పప్రచ్ఛ స్కందమాదరాత్ || ౧ ||
నారద ఉవాచ |
భగవన్ పరమేశాన సంప్రాప్తాఖిలశాస్త్రక |
స్కందసేనాపతే స్వామిన్ పార్వతీప్రియనందన || ౨ ||
యజ్జపాత్ కవితా విద్యా శివే భక్తిశ్చ శాశ్వతీ |
అవాప్తిరణిమాదీనాం సంపదాం ప్రాప్తిరేవ చ || ౩ ||
భూతప్రేతపిశాచానామగమ్యత్వమరోగతా |
మహావిజ్ఞానసంప్రాప్తిర్మహారాజవిపూజనమ్ || ౪ ||
వరప్రసాదో దేవానాం మహాభోగార్థసంభవః |
నష్టరాజ్యశ్చ సిద్ధిశ్చ తథా నిగళమోచనమ్ || ౫ ||
ఋణదారిద్ర్యనాశశ్చ తనయప్రాప్తిరేవ చ |
అశ్రుతస్య ప్రబంధస్య సమ్యగ్వ్యాఖ్యానపాటవమ్ || ౬ ||
ప్రతిభోన్మేషణం చైవ ప్రబంధరచనా తథా |
భవంత్యచిరకాలేన తద్ర్బూహి హర సుప్రజః || ౭ ||
స్కంద ఉవాచ |
సాధు పృష్టం మహాభాగ కమలాసనసత్సుత |
త్వయైన పృష్టమేతద్ధి జగతాముపకారకమ్ || ౮ ||
బాల ఏవ పురా సోఽహం స్వపనం ప్రాప్తవాన్ యదా |
తదా మే నికటం ప్రాప్య దక్షిణామూర్తిరూపధృత్ || ౯ ||
పితా మే పంజరం స్వస్య సర్వవిజ్ఞానదాయకమ్ |
ఉపాదిశదహం తేన విజ్ఞానమగమం ధృవమ్ || ౧౦ ||
దేవసేనాపతి త్వం చ తారకస్య జయం తథా |
విద్యామయోఽహం భగవన్ తజ్జపాన్మునిసత్తమ || ౧౧ ||
సదా తస్య జపం కుర్యాదాత్మనః క్షేమకృద్యది |
ఇతః పూర్వం న కస్యాపి మయా నోక్తం యతవ్రత || ౧౨ ||
ఉపదేశం తవైవాద్య కరవాణి శుభాప్తయే |
త్వన్ముఖాదేవ లోకేషు ప్రసిద్ధం చ గమిష్యతి || ౧౩ ||
ఋషిస్తస్య శుకః ప్రోక్తశ్ఛంధోఽనుష్టుబుదాహృతమ్ |
దేవతా దక్షిణామూర్తిః ప్రణవో బీజమిష్యతే || ౧౪ ||
స్వాహా శక్తిః సముచ్చార్య నమః కీలకముచ్యతే |
వర్ణః శుక్లః సమాఖ్యాతో వాంఛితార్థే నియుజ్యతే || ౧౫ ||
తతః సాంబం శివం ధ్యాయేద్దక్షిణామూర్తిమవ్యయమ్ |
ఛాయాపిహితవిశ్వస్య మూలే న్యగ్రోధశాఖినః || ౧౬ ||
మణిసింహాసనాసీనం మునిబృందనిషేవితమ్ |
వరభూషణదీప్తాంగం మాణిక్యమకుటోజ్జ్వలమ్ || ౧౭ ||
మందాకినీజలస్పర్ధి ప్రభాభాసితవిగ్రహమ్ |
శుక్లవస్త్రపరీధానం శుక్లమాల్యానులేపనమ్ || ౧౮ ||
స్ఫాటికీమక్షమాలాం చ వహ్నీం చ భుజగాధిపమ్ |
పుస్తకం చ కరైర్దివ్యైర్దధానం చంద్రశేఖరమ్ || ౧౯ ||
మంజుమంజీరనినదైరాకృష్టాఖిలసారసమ్ |
కేయూరకోటివిలసద్వరమాణిక్యదీప్తిభిః || ౨౦ ||
తేజితాశేషభువనం తేజసామేకసంశ్రయమ్ |
జాహ్నవీసలిలోన్మగ్న జటామండలమండితమ్ || ౨౧ ||
ఉత్ఫుల్లకమలోదారచక్షుషం కరుణానిధిమ్ |
భుజంగశిశు విత్రస్త కురంగశిశుమండితమ్ || ౨౨ ||
అగ్రేంద్రతనయాసక్తవరాంగమతులప్రభమ్ |
పాదశుశ్రూషణాసక్త నాకనారీసమావృతమ్ || ౨౩ ||
కైలాసశృంగసంకాశ మహోక్షవరవాహనమ్ |
బ్రహ్మాదిభిరభిధ్యేయం బ్రహ్మణ్యం బ్రహ్మనిష్ఠితమ్ || ౨౪ ||
ప్రాచీనానామపి గిరామగోచరమనామయమ్ |
ధ్యాయన్నేవం మహాదేవం ప్రజపేత్పంజరం శుభమ్ || ౨౫ ||
అస్య శ్రీదక్షిణామూర్తి పంజర మహామంత్రస్య శ్రీ శుక ఋషిః అనుష్టుప్ ఛందః శ్రీదక్షిణామూర్తిర్దేవతా ఓం బీజం స్వాహా శక్తిః నమః కీలకం శ్రీ దక్షిణామూర్తి ప్రసాదసిద్ధ్యర్థే జపే వినియోగః |
ఆం ఈం ఊం ఐం ఔం అః ఇతి న్యాసః ||
ధ్యానమ్ –
వటమూలనివాసబద్ధతృష్ణం
మునినికరాయ వివేకమాదిశంతం |
పశుపతిమగరాజకన్యకాయై
స్మరహృదయాశు వికీర్ణ వామభాగమ్ ||
వీరాసనైకనిలయాయ హిరణ్మయాయ
న్యగ్రోధమూలగృహిణే నిటలేక్షణాయ |
గంగాధరాయ గజచర్మవిభూషణాయ
ప్రాచీనపుణ్యపురుషాయ నమః శివాయ ||
ముద్రా పుస్తక వహ్ని నాగవిలసద్బాహుం ప్రసన్నాసనం
ముక్తాహారవిభూషితం శశికళాభాస్వత్కిరీటోజ్జ్వలమ్ |
అజ్ఞానాపహమాదిమాదిమగిరామర్థం భవానీపతిం
న్యగ్రోధాత్తనివాసినం పరగురుం ధ్యాయేదభీష్టాప్తయే ||
శిరో మే దక్షిణామూర్తిః పాతు పాశవిమోచకః |
ఫాలం పాతు మహాదేవః పాతు మే విశ్వదృగ్దృశౌ || ౧ ||
శ్రవణే పాతు విశ్వాత్మా పాతు గండస్థలం హరః |
శివో మే నాసికాం పాతు తాల్వోష్ఠౌ పార్వతీపతిః || ౨ ||
జిహ్వాం మే పాతు విద్యాత్మా దంతాన్ పాతు వృషధ్వజః |
చుబుకం పాతు సర్వాత్మా శ్రీకంఠః కంఠమేవతు || ౩ ||
స్కంధౌ పాతు వృషస్కంధః శూలపాణిః కరౌ మమ |
సర్వజ్ఞో హృదయం పాతు స్తనౌ పాతు గజాంతకః || ౪ ||
వక్షో మృత్యుంజయః పాతు కుక్షిం కుక్షిస్థవిష్టపః |
శర్వో వళిత్రయం పాతు పాతు నాభిం గిరీశ్వరః || ౫ ||
వ్యోమకేశః కటిం పాతు గుహ్యం పాతు పురాంతకః |
ఊరూ పాతు మఘధ్వంసీ జానునీ పాతు శంకరః || ౬ ||
జంఘే పాతు జగత్ స్రష్టా గుల్ఫౌ పాతు జగద్గురుః |
అపస్మారౌపమర్దీ మే పాదౌ పాతు మహేశ్వరః || ౭ ||
రోమాణి వ్యోమకేశో మే పాతు మాంసం పినాకధృత్ |
దారాన్ పాతు విరూపాక్షః పుత్రాన్ పాతు జటాధరః || ౮ ||
పశూన్ పశుపతిః పాతు భ్రాతౄన్ భూతేశ్వరో మమ |
రక్షాహీనం తు యత్ స్థానం సర్వతః పాతు శంకరః || ౯ ||
ఇతీదం పంజరం యస్తు పఠేన్నిత్యం సమాహితః |
గద్యపద్యాత్మికా వాణీ ముఖాన్నిస్సరతి ధ్రువమ్ || ౧౦ ||
వ్యాచష్టే హ్యశ్రుతం శాస్త్రం తనుతే కావ్యనాటకమ్ |
శాస్త్రషట్కం చతుర్వేదాః సమయాః షట్తథైవ చ || ౧౧ ||
స్వయమేవ ప్రకాశం తే నాత్ర కార్యా విచారణా |
తస్య గేహే మహాలక్ష్మీః సన్నిధత్తే సదాఽనఘ || ౧౨ ||
తస్య కాత్యాయనీ దేవీ ప్రసన్నా వరదా భవేత్ |
ఆధయో వ్యాధయశ్చాపి న భవంతి కదాచన || ౧౩ ||
స చ నాశయతే నిత్యం కాలమృత్యుమపి ధ్రువమ్ |
జపేదవశ్యం విద్యార్థీ గ్రహణే చంద్రసూర్యయోః || ౧౪ ||
దక్షిణామూర్తిదేవస్య ప్రాసాదాత్ పండితో భవేత్ |
భక్తిశ్రద్ధే పురస్కృత్య దక్షిణామూర్తిపంజరమ్ || ౧౫ ||
జపిత్వా కవితాం విద్యాం ప్రాప్నుయాత్ సర్వమాప్నుయాత్ |
జలమధ్యే స్థిరో భూత్వా జపిత్వా పంజరోత్తమమ్ || ౧౬ ||
భూతప్రేతపిశాచాదీన్నాశయేన్నాత్ర సంశయః |
మహాపాతకయుక్తో వా యుక్తో వా సర్వపాతకైః || ౧౭ ||
ముచ్యతే బ్రహ్మహత్యాయా అపి నారదసత్తమ |
త్రిసంధ్యం పంజరమిదమావర్తయతి యః పుమాన్ || ౧౮ ||
కిం న సిద్ధ్యతి తస్యాత్ర సుకృతం మునిసత్తమ |
తేనేష్టం రాజసూయేన కృతం దానాదికేన చ || ౧౯ ||
పుంశబ్దవాచ్యః స పుమాన్ పుణ్యానాం భాజనం స చ |
రోగముక్తః స ఏవ స్యాదతులాం కీర్తిమాప్నుయాత్ || ౨౦ ||
పుత్రాః కులకరాస్తస్య సంపద్యంతే న సంశయః |
ఆప్నుయాదఖిలం రాజ్యం తథా బంధవిమోచనమ్ || ౨౧ ||
పూజ్యతే పార్థివస్థానే తస్య వశ్యా వరాంగనాః |
బంధూనాం రక్షణే భూయాత్ సమానేషూత్తమో భవేత్ || ౨౨ ||
ఇహ భుక్త్వాఽఖిలాన్ భోగాన్ తథైవాముష్మికానపి |
కైలాసే సుచిరం స్థిత్వా దక్షిణామూర్తిసన్నిధౌ || ౨౩ ||
తస్మాదవాప్య విజ్ఞానం ప్రాప్య రుద్రత్వమేవ చ |
విలయం యాతి తత్త్వార్థీ నాత్ర కార్యా విచారణా || ౨౪ ||
తస్మాత్ సర్వప్రయత్నేన మోక్షార్థీ సర్వదా పుమాన్ |
ఇదమావర్తయేన్నిత్యం దక్షిణామూర్తి పంజరమ్ |
సర్వపాపవిశుద్ధాత్మా యాతి బ్రహ్మ సనాతనమ్ || ౨౫ ||
ఇతి గుహనారదసంవాదే శ్రీ దక్షిణామూర్తి పంజరమ్ ||
మరిన్ని శ్రీ శివ స్తోత్రాలు చూడండి. మరిన్ని శ్రీ దక్షిణామూర్తి స్తోత్రాలు చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.